नयाँ दिल्ली – अमेरिकी प्रविधि कम्पनी गुगलले भारतमा ‘पिक्सल’ फोनको उत्पादन गर्ने भएको छ ।
भारतको राजधानी नयाँ दिल्लीमा आयोजित ‘गुगल फर इन्डिया’ समारोहलाई सम्बोधन गर्दै गुगलको उपकरण तथा सेवाका प्रमुख रिक ओस्टरलोहले भारतमा पिक्सल फोनको उत्पादन गर्ने घोषणा गरेका हुन् ।
गुगलको माउ कम्पनी अल्फबेटका अनुसार सन् २०२४ बाट भारतमा ‘पिक्सल ८’ फोनको उत्पादन थालिने इकोनोमिक टाइम्सले जनाएको छ । ‘पिक्सलका लागि भारत प्राथमिक बजार हो ।’ ओस्टरलोहलाई उद्धृत गर्दै इकोनोमिक टाइम्सले जनाएको छ ।
भारतीय प्रधानमन्त्री नरेन्द्र मोदीको ‘मेक इन इन्डिया’ नामक कार्यक्रम अनुसार गुगलले भारतमा पिक्सल फोनको उत्पादन गर्न लागेको हो ।
