बारा माघ १७ । बारा क्षेत्र नं २ बाट नेपाली कम्युनिस्ट पार्टीका उम्मेदवार रामेश यादव प्रतिनिधि सभा सदस्यमा निर्वाचित भएपछि प्रत्यक्ष निर्वाचित प्रधानमन्त्री सम्बन्धी कानुन ल्याउन प्रतिनिधि सभामा सशक्त रूपमा आवाज उठाउने प्रतिबद्धता व्यक्त गर्नुभएको छ। उहाँले जनताको प्रत्यक्ष मतबाट प्रधानमन्त्री चयन हुने व्यवस्था देशको राजनीतिक स्थायित्वका लागि आवश्यक रहेको बताउनुभयो।
प्राइम टेलिभिजनका रिपोर्टर श्रीकान्त गुप्तासँगको अन्तर्वार्तामा उम्मेदवार यादवले हालको संसदीय अभ्यासले जनअपेक्षा पूरा गर्न नसकेको उल्लेख गर्दै प्रत्यक्ष निर्वाचित प्रधानमन्त्रीको अवधारणाले सरकारलाई जनउत्तरदायी र स्थिर बनाउने दाबी गर्नुभयो। “अब संसदमा पुगेर जनताको मुद्दा बलियोसँग उठाउँछु। प्रत्यक्ष निर्वाचित प्रधानमन्त्रीको कानुन हाम्रो प्राथमिक एजेन्डा हुनेछ,” उहाँले भन्नुभयो।
अन्तर्वार्ताका क्रममा यादवले बारा क्षेत्र नं २ को अवस्था अत्यन्तै जर्जर रहेको चित्रण गर्नुभयो। विकासका आधारभूत पूर्वाधार—सडक, खानेपानी, स्वास्थ्य र शिक्षामा क्षेत्र निकै पछाडि परेको उहाँको भनाइ छ। “बारा जिल्लामै सबैभन्दा पछाडि परेको क्षेत्र क्षेत्र नं २ हो। यहाँ विकासका नाममा जनताले केवल आश्वासन मात्र पाएका छन्,” उहाँले गुनासो गर्नुभयो।
यादवले विगतमा निर्वाचित नेताहरू जितेपछि फेरि जनतासँग भेट्न नआउने प्रवृत्ति मौलाउँदै गएको भन्दै त्यसलाई आफूले तोड्ने प्रतिवद्धता व्यक्त गर्नुभयो। “नेता जितेर गएपछि फर्केर नआउने संस्कृति छ। म त्यसको अन्त्य गर्छु। नियमित रूपमा जनतासँग भेटघाट, संवाद र अनुगमन हुनेछ,” उहाँले स्पष्ट पार्नुभयो।
क्षेत्र नं २ का स्थानीय समस्यालाई प्राथमिकतामा राखेर संसदमा आवाज उठाउने भन्दै यादवले कृषि, रोजगारी, सिँचाइ, स्वास्थ्य चौकी सुदृढीकरण र शिक्षा सुधारलाई पहिलो चरणका कामका रूपमा अघि बढाउने योजना सुनाउनुभयो। जनताले दिएको विश्वासलाई कामबाट प्रमाणित गर्ने उहाँको भनाइ छ।
स्थानीय बासिन्दाले पनि नयाँ सांसदबाट ठोस विकास र नियमित उपस्थितिको अपेक्षा गरेका छन्। अब प्रतिनिधि सभामा यादवको भूमिकाले बारा क्षेत्र नं २ का दीर्घकालीन समस्या समाधानतर्फ कस्तो गति लिन्छ भन्नेमा सबैको चासो रहेको छ।
