सर्लाही चैत २०।रानी कुमारी ।सर्लाही ईश्वरपुर नगरपालिकाका नगरप्रमुख मनोज आचार्य पछिल्लो समय विकास निर्माणका कामलाई तीव्रता दिँदै जनतामाझ लोकप्रिय बन्दै गएको चर्चा बढ्न थालेको छ। नगरप्रमुख आचार्यले आफू निर्वाचित भएर जिम्मेवारी सम्हालेपछि नगरवासीले प्रत्यक्ष रूपमा विकासको अनुभूति गर्न थालेको दाबी गरेका छन्।
उनका अनुसार ईश्वरपुर नगरपालिकाले पछिल्ला वर्षहरूमा शिक्षा, स्वास्थ्य, सडक पूर्वाधार, धार्मिक सम्पदाको संरक्षण, बजार व्यवस्थापन लगायतका क्षेत्रमा उल्लेखनीय काम गरेको छ। “हामीले जनताको आवश्यकतालाई प्राथमिकतामा राखेर योजना अघि बढाएका छौं, त्यसैले अहिले नगरबासीले परिवर्तन महसुस गर्न थालेका छन्,” नगरप्रमुख आचार्यले बताएका छन्।
नगरपालिकाभित्रका विभिन्न वडामा सडक स्तरोन्नति, ढल निर्माण, विद्यालय भवन मर्मत तथा नयाँ संरचना निर्माण, स्वास्थ्य चौकीको सेवा विस्तार, खानेपानी तथा सरसफाइमा सुधारजस्ता कामले स्थानीयवासी उत्साहित बनेका छन्। नगरका कतिपय बस्तीमा पहिलेको तुलनामा सहज आवतजावत, शिक्षा र स्वास्थ्य सेवामा पहुँच बढेको स्थानीयको भनाइ छ।
धार्मिक तथा सांस्कृतिक सम्पदाको संरक्षणलाई समेत नगरपालिकाले विशेष प्राथमिकता दिएको जनाइएको छ। विभिन्न मठमन्दिर, धार्मिक स्थल र सार्वजनिक संरचनाको संरक्षण तथा सौन्दर्यीकरणमार्फत नगरको पहिचान मजबुत बनाउने प्रयास भइरहेको नगरप्रमुख आचार्यको भनाइ छ। यससँगै बजार क्षेत्रको व्यवस्थापन, सरसफाइ, ट्राफिक सहजता र व्यवसायिक वातावरण सुधारमा पनि नगरपालिका सक्रिय देखिएको छ।
नगरप्रमुख आचार्यले विकासलाई केवल भौतिक संरचनामा सीमित नराखी सामाजिक रूपान्तरणसँग जोडेर अघि बढाइएको बताए। उनले शिक्षा र स्वास्थ्यलाई नगरको दीर्घकालीन समृद्धिको आधार मान्दै यी क्षेत्रलाई प्राथमिकतामा राखिएको उल्लेख गरे। “विकास भनेको केवल सडक र भवन बनाउनु मात्र होइन, जनताको जीवनस्तरमा सुधार ल्याउनु पनि हो,” उनले भने।स्थानीयवासीहरूका अनुसार नगरपालिकाले पछिल्लो समय जनचाहना अनुसार योजना छनोट र कार्यान्वयनमा सक्रियता देखाएको छ। जनप्रतिनिधिहरू जनतामाझ पुगेर समस्या बुझ्ने र समाधानका लागि पहल गर्ने शैलीले पनि नगरप्रमुख आचार्यप्रति विश्वास बढाएको देखिन्छ।
यद्यपि केही स्थानमा अझै थप कामको अपेक्षा रहेको स्थानीयको भनाइ छ। तर समग्र रूपमा हेर्दा ईश्वरपुर नगरपालिकामा विकास निर्माणले गति लिएको र त्यसले नगरप्रमुख मनोज आचार्यको लोकप्रियता बढाएको चर्चा नगरभर फैलिएको छ। विकासको यही लयलाई निरन्तरता दिन सके ईश्वरपुर नगरपालिकाले अझ व्यापक परिवर्तनको अनुभूति दिलाउने अपेक्षा गरिएको छ।
