बारा – जेठ २५। आर्थिक वर्षको अन्त्यसँगै देशभरि असारे विकासको लहर चलेको छ। संघीय, प्रदेश, स्थानीय तह र वडास्तरमा बजेट सक्न हतार–हतारमा विकासका नाममा सडक, नाला, भवन निर्माण जस्ता काम तीव्र रुपमा भइरहेको छ। यस्तै हतारको विकासले बाराको महागढीमाई नगरपालिका–६ मा निर्माण गरिएको कालोपत्रे सडकको गुणस्तरमाथि गम्भीर प्रश्न उठेको छ।
पत्रहट्टीदेखि बर्वा–पर्सा जोड्ने झण्डै १ किलोमिटर सडकमा हालै गरिएको कालोपत्रे केही दिनमै उप्किन थालेको छ। स्थानीयले अलकत्रासहितको कालोपत्रे सडक १५ दिन नपुग्दै उप्किएको भन्दै निर्माण कार्यप्रति आक्रोश व्यक्त गरेका छन्। उनीहरूले निर्माण कम्पनीले गुणस्तरहीन सामाग्री प्रयोग गरेको र काममा लापरवाही गरेको आरोप लगाएका छन्।
स्थानीय बसीन्दाका अनुसार सडकमा पाथरमात्र राखेर त्यसमाथि पातलो कालोपत्रे गरिएको छ। रोलर समेत नचलाई काम गरिएकाले सडक खोलिन थालेको उनको आरोप छ। “सडकमा अलकत्रा त छैन नै, भित्रबाट ढुंगा निस्किन थालेको छ,” यादवले भने।
उक्त सडक भागवती श्री राधेमाई निर्माण सेवा, वीरगंजले निर्माण गरेको हो। कम्पनीले २०८१ मंसिर २५ गते सम्झौता गरी २०८१ चैत ३१ गतेभित्र काम सम्पन्न गर्ने शर्तमा ठेक्का लिएको थियो। १ किलोमिटर कालोपत्रेका लागि ६२ लाख २५ हजार ७१० रुपैयाँ २ पैसा ठेक्का गरिएको थियो। आयोजनाको नाम पत्रहट्टीस्थित नन्द सहनीको घरदेखि हुलाकी राजमार्गसम्मको सडक सुधार राखिएको छ।
निर्माण सेवाका प्रोपराइटर नन्दराज सर्राफले भने आरोप अस्वीकार गरेका छन्। “सडकमा गाडी चलाएर हेर्नुस्, फुट्दैन,” उनले दाबी गरे। “यदि गुणस्तरमा शंका छ भने इन्जिनियरसँग ल्याब परीक्षण गराउन तयार छु।” उनका अनुसार सब-बेस र बेस गरी १५–१५ सेन्टी र प्रिमिस ३ सेन्टी राखेर काम गरिएको हो।
तर निर्माण कार्यको प्राविधिक परीक्षण अझै बाँकी रहेको जानकारी प्राप्त भएको छ। सघन शहरी तथा भवन निर्माण आयोजना, वीरगंजका इन्जिनियर मुकेश यादवका अनुसार अहिले कोर कटिङ्ग गरेर गुणस्तर परीक्षण गरिने प्रक्रिया बाँकी छ। “गुणस्तर मापनका लागि कोर काट्नुपर्ने हुन्छ,” उनले भने, “शंकास्पद स्थानमा स्थानीयको रोहबरमा परीक्षण गरिनेछ।”
सडकको अवस्था र जनगुनासोलाई ध्यानमा राख्दै स्थानीयले यथाशिघ्र गुणस्तर परीक्षण गरी दोषी ठेकेदारलाई कारबाहीको माग गरेका छन्। उनीहरूका अनुसार यदि यस्तै गुणस्तरहीन विकास भइरहने हो भने सरकारी बजेट र स्रोतसाधनको दुरुपयोग मात्र हुने होइन, जनताको ज्यान र सम्पत्तिसमेत जोखिममा पर्नेछ।
