सर्लाही असार ३। रानी कुमारी गुप्ता। सर्लाहीको ईश्वरपुर नगरपालिका मा हरेक वर्ष विकासका नाममा करोडौं रुपैयाँ बजेट खर्च हुने गरे पनि सडक, नाला तथा पानी निकासको समस्या भने ज्यूँका त्यूँ रहेको भन्दै स्थानीयवासीले गुनासो गरेका छन्।
नगरपालिकामा १५ वटा वडा रहेका छन्। तीमध्ये अधिकांश वडाका सडकहरू अझै पनि कच्ची अवस्थामा रहेको स्थानीयको आरोप छ। वर्षायाममा सडक हिलाम्मे हुने र हिँडडुल गर्नसमेत कठिन हुने गरेको छ भने सुख्खा मौसममा धुलोका कारण सर्वसाधारणले विभिन्न समस्या झेल्नुपरेको बताएका छन्।
वडा नं ७ स्थानीयवासीका अनुसार नगरप्रमुख मनोज आचार्य र वडा अध्यक्ष नाथु राम चौधरीको चरम लापरवाहीले सडक ढलान, नाला निर्माण तथा व्यवस्थित पानी निकासको अभावका कारण वर्षेनी समस्या दोहोरिने गरेको छ। सडकमा पानी जम्ने, हिलो हुने तथा यातायात सञ्चालनमा कठिनाइ हुने समस्या लामो समयदेखि कायम रहे पनि सम्बन्धित निकायले प्रभावकारी समाधान गर्न नसकेको उनीहरूको भनाइ छ।
नगरपालिकाले हरेक वर्ष संघीय तथा प्रदेश सरकारबाट प्राप्त हुने विकास बजेट खर्च गरे पनि त्यसको प्रत्यक्ष प्रभाव जनताले अनुभूति गर्न नसकेको स्थानीयको आरोप छ। विकास निर्माणका योजनामा ठूलो रकम खर्च भएको देखाइए पनि अधिकांश बस्ती र टोलका सडकको अवस्था अझै दयनीय रहेको उनीहरू बताउँछन्।
चार आर्थिक वर्षअघि निर्वाचित जनप्रतिनिधिहरूको कार्यकाल अन्तिम चरणमा पुग्न लाग्दा पनि आधारभूत पूर्वाधारको अवस्थामा उल्लेखनीय सुधार नदेखिएको भन्दै स्थानीयले असन्तुष्टि व्यक्त गरेका छन्। नगरप्रमुख मनोज आचार्य सहित जनप्रतिनिधिहरूले विकासका प्रतिबद्धता जनाए पनि अपेक्षाअनुसार काम हुन नसकेको उनीहरूको भनाइ छ।
विशेषगरी ग्रामीण बस्तीहरूमा सडक, ढल तथा पानी निकासको उचित व्यवस्था नहुँदा विद्यार्थी, ज्येष्ठ नागरिक, किसान तथा दैनिक आवतजावत गर्ने नागरिक सबैभन्दा बढी प्रभावित भएका छन्। वर्षाको समयमा सडक हिलाम्मे हुँदा विद्यालय, स्वास्थ्य संस्था तथा बजारसम्म पुग्नसमेत कठिन हुने गरेको स्थानीयले बताएका छन्।
स्थानीयवासीले विकास बजेटको प्रभावकारी उपयोग, पारदर्शी कार्यान्वयन तथा दीर्घकालीन पूर्वाधार निर्माणमा ध्यान दिन नगरपालिकासँग माग गरेका छन्। उनीहरूले नगरभित्रका सडक, नाला तथा पानी निकास व्यवस्थापनलाई प्राथमिकतामा राखी काम गर्नुपर्ने बताएका छन्।
यता नगरपालिकाका जनप्रतिनिधिहरूले भने विभिन्न विकास निर्माणका काम भइरहेको र स्रोत–साधन तथा बजेटको सीमितताका बीच चरणबद्ध रूपमा पूर्वाधार विकासलाई अगाडि बढाइएको बताउने गरेका छन्। तर स्थानीयहरू भने विकासको वास्तविक अनुभूति अझै हुन नसकेको भन्दै सम्बन्धित निकायको ध्यानाकर्षण गराइरहेका छन्।
