बारा जेठ ३१ –श्री कान्त गुप्ता । महागढीमाई नगरपालिका वडा नं. २ स्थित बरियारपुर बजारमा आर्थिक वर्षको अन्तिम समयमा सुरु गरिएको निर्माण कार्यका कारण स्थानीय व्यापारी तथा सर्वसाधारणले सास्ती खेप्नुपरेको छ। वर्षौंदेखि पानी निकासको समस्याबाट प्रभावित बजार क्षेत्रमा नगरपालिकाले असार महिनाको अन्त्यतिर निर्माण कार्य थालेपछि बजार क्षेत्र अस्तव्यस्त बनेको हो।
स्थानीयका अनुसार महागढीमाई नगरपालिकाका जनप्रतिनिधिहरू निर्वाचित भएको चार आर्थिक वर्ष बित्न लागे पनि र नगरप्रमुखको यो दोस्रो कार्यकाल समेत हो। तर बरियारपुर बजारमा पानी निकासको दीर्घकालीन समस्या समाधान गर्न समयमै पहल नगरी आर्थिक वर्षको अन्तिम महिनामा मात्र निर्माण कार्य सुरु गरिएको भन्दै स्थानीयवासीले असन्तुष्टि व्यक्त गरेका छन्।
निर्माण कार्यका कारण बजारका सडकहरू खनिएका छन्। जसले गर्दा दैनिक उपभोग्य सामग्री खरिद गर्न आउने ग्राहकहरूलाई आवतजावतमा कठिनाइ भइरहेको छ। व्यापारीहरूका अनुसार सडक अवरुद्ध र हिलोका कारण ग्राहकको चहलपहल घटेको छ, जसले व्यापार व्यवसायमा प्रत्यक्ष असर परेको छ।
स्थानीय व्यापारीहरूले भने नगरपालिकाले योजना कार्यान्वयनमा ढिलाइ गर्दा आफूहरू आर्थिक रूपमा मारमा परेको बताएका छन्। “वर्षभरि काम नगर्ने र आर्थिक वर्ष सकिन लाग्दा हतारमा काम सुरु गर्ने प्रवृत्तिले बजार क्षेत्र अस्तव्यस्त बनेको छ ।
महागढीमाई नगरपालिकाको सिभिल इन्जिनियर प्रेम शंकर ठाकुरका अनुसार निर्माण योजनाको लागत करिब दुई करोड नब्बे लाख रुपैयाँ भन्दा बढी रहेको छ ।
स्थानीयले भने सार्वजनिक निर्माण कार्य सञ्चालन गर्दा निर्माण कम्पनी वा उपभोक्ता समितिको नाम, योजना लागत, सम्झौता मिति तथा सम्पन्न हुने समयावधि उल्लेख गरिएको सूचना बोर्ड राख्नुपर्ने कानुनी व्यवस्था भए पनि निर्माणस्थलमा कुनै किसिमको सूचना बोर्ड राखिएको छैन ।नगरपालिकाको मिलोमतोमा भइरहेको निर्माणको काम कुनै पारदर्शिता नरहेको स्थानीयले बताएका छन्।
स्थानीयवासीले भने, “कति बजेटको योजना हो, कसले निर्माण गरिरहेको छ, कहिले सम्पन्न हुने हो भन्ने कुनै जानकारी छैन। सूचना बोर्ड नै नराखिएकाले काम गुणस्तरीय भइरहेको छ कि छैन भन्ने विषयमा समेत स्थानीयहरु अन्योलमा छन्।” नगरपालिकाको अन्य ठाउँमा बिकास निर्माणमा कुनै किसिमको सूचना बोर्ड राखिएको छैन । कुनै किसिमको पारदर्शिता छैन ।
एक अर्को स्थानीयले भने यति ठूलो बजेटको योजना सञ्चालन भइरहँदा पनि सूचना बोर्ड नराखिनु र योजना सम्बन्धी विवरण सार्वजनिक नगरिनुले नगरपालिकाको पारदर्शिता माथि प्रश्न उठेको छ।
स्थानीयवासीले नगरपालिकासँग निर्माण कार्यलाई व्यवस्थित, पारदर्शी र गुणस्तरीय बनाउन माग गरेका छन्। साथै वर्षौंदेखिको पानी निकास समस्या समाधान गर्ने उद्देश्यले सुरु गरिएको योजना प्रभावकारी रूपमा सम्पन्न गर्न तथा सर्वसाधारणलाई कमभन्दा कम सास्ती हुने वातावरण सिर्जना गर्न ध्यानाकर्षण गराएका छन्।
