जनकपुरधाम, जेठ – ३० । नेपाली कांग्रेसले मधेस प्रदेशमा संगठन सुदृढीकरण, कार्यकर्ता परिचालन तथा आगामी राजनीतिक रणनीतिबारे छलफल गर्न जनकपुरधाममा मधेस स्तरीय कार्यकर्ता भेला आयोजना गरेको छ। मधेस प्रदेशको राजधानी जनकपुरधामस्थित महेन्द्र नारायण निधि प्रतिष्ठानमा सम्पन्न उक्त भेलामा प्रदेशभरका कांग्रेस नेता तथा कार्यकर्ताको उल्लेखनीय सहभागिता रहेको थियो।
भेलाका प्रमुख अतिथि नेपाली कांग्रेसका पूर्व उपसभापति, पूर्व उपप्रधानमन्त्री तथा पूर्व गृहमन्त्री विमलेन्द्र निधिले पार्टीभित्र एकता, अनुशासन र सक्रिय कार्यकर्ता परिचालनको आवश्यकता औंल्याउँदै कांग्रेसलाई जनताको भरोसाको केन्द्रका रूपमा स्थापित गर्न सबै तहका नेता–कार्यकर्ता एकजुट हुनुपर्ने बताएका थिए। उनले लोकतान्त्रिक मूल्य, संविधानको रक्षा तथा जनताका अपेक्षा पूरा गर्न कांग्रेस अझ जिम्मेवार बन्नुपर्ने धारणा व्यक्त गरे।
कार्यक्रम नेपाली कांग्रेस बारा जिल्ला सभापति राजेश राय यादवको सभापतित्वमा सम्पन्न भएको थियो। भेलाका संयोजक आनन्द ढुंगानाले स्वागत मन्तव्य व्यक्त गर्दै मधेस प्रदेशमा पार्टी संगठनलाई थप बलियो बनाउन यस्ता कार्यक्रमले महत्वपूर्ण भूमिका खेल्ने बताए।
कार्यक्रममा विशेष अतिथिका रूपमा नेपाली कांग्रेसका पूर्व सहमहामन्त्री तथा पूर्व मन्त्री उमाकान्त चौधरी सहभागी थिए। त्यसैगरी बागमती प्रदेशका पूर्व मन्त्री कुन्दनराज काफ्ले, पूर्व मन्त्री मोहन बस्नेतलगायत वरिष्ठ नेताहरूले पनि सम्बोधन गरेका थिए। वक्ताहरूले पार्टी संगठन विस्तार, जनतासँगको सम्बन्ध सुदृढीकरण तथा आगामी राजनीतिक चुनौतीहरूको सामना गर्न कार्यकर्ताहरूलाई सक्रिय र जिम्मेवार बन्न आग्रह गरेका थिए।
भेलामा मधेस प्रदेशका आठवटै जिल्लाबाट आएका नेता तथा कार्यकर्ताहरूको बाक्लो उपस्थिति रहेको थियो। सहभागीहरूले पार्टीको वर्तमान अवस्था, संगठन विस्तार, जनसरोकारका विषय तथा आगामी कार्यक्रमबारे आफ्ना धारणा राखेका थिए।
नेताहरूले कांग्रेसलाई गाउँगाउँसम्म थप प्रभावकारी बनाउने, युवालाई पार्टीमा आकर्षित गर्ने तथा जनताका समस्या समाधानमा केन्द्रित भएर काम गर्नुपर्नेमा जोड दिएका थिए। कार्यक्रमले मधेस प्रदेशमा कांग्रेस संगठनलाई थप सुदृढ बनाउने विश्वास सहभागीहरूले व्यक्त गरेका छन्।
जनकपुरधाममा सम्पन्न उक्त भेला नेपाली कांग्रेसको मधेस केन्द्रित संगठनात्मक अभियानको महत्वपूर्ण कडीका रूपमा हेरिएको छ।
