जनकपुरधाम, जेठ २६ रानी कुमारी गुप्ता । मधेश प्रदेशको राजधानी जनकपुरधाममा ट्राफिक व्यवस्थापन दिनप्रतिदिन अस्तव्यस्त बन्दै गएको छ। मुख्य सडक तथा बजार क्षेत्रका सडक पेटीहरूमा जथाभावी सवारीसाधन पार्किङ गरिनुका साथै पैदलयात्रीका लागि निर्माण गरिएका फुटपाथसमेत अतिक्रमणमा परेपछि सर्वसाधारणले सास्ती भोग्नुपरेको छ।
जनक चौक, शिव चौक, रामानन्द चौक, भानु चौक, कदम चौक लगायतका व्यस्त बजार क्षेत्रमा मोटरसाइकल, ई–रिक्सा, अटो र चारपाङ्ग्रे सवारीसाधनहरू सडक पेटीमै पार्किङ गर्ने प्रवृत्ति बढ्दो छ। यसले पैदलयात्रीलाई सडकमै हिँड्न बाध्य बनाएको छ भने दुर्घटनाको जोखिमसमेत बढाएको स्थानीयवासीको गुनासो छ।
स्थानीय व्यवसायी तथा नागरिकका अनुसार ट्राफिक नियम उल्लंघन गर्ने सवारीसाधनमाथि प्रभावकारी निगरानी र कारबाही हुन नसक्दा ट्राफिक व्यवस्थापन पूर्ण रूपमा भद्रगोल बनेको हो। बजार क्षेत्रमा दिनभर सडक किनार र फुटपाथमा सवारीसाधन थन्क्याइए पनि सम्बन्धित निकायको ध्यान पुग्न नसकेको उनीहरूको भनाइ छ।
विशेष गरी कार्यालय समय र बिहान–साँझको व्यस्त समयमा सडक पेटीमा पार्किङ गरिएका सवारीसाधनका कारण सवारी आवागमन प्रभावित हुने गरेको छ। कतिपय स्थानमा सडकको आधाभन्दा बढी भाग पार्किङका लागि प्रयोग हुँदा ट्राफिक जामको समस्या समेत बढेको देखिन्छ।
नागरिकहरूले ट्राफिक प्रहरीको उपस्थितिका बाबजुद नियमविपरीत पार्किङ गर्नेहरूमाथि आवश्यक कारबाही नभएको आरोप लगाएका छन्। “सडक पेटी पैदलयात्रीका लागि बनाइएको हो, तर अहिले पार्किङ स्थल जस्तै बनेको छ। ट्राफिक प्रहरी देखिन्छन् तर व्यवस्थापन प्रभावकारी छैन,” एक स्थानीयले बताए।
यता ट्राफिक व्यवस्थापनमा देखिएको कमजोरीका कारण जनकपुरधामको सौन्दर्यसमेत प्रभावित भएको सरोकारवालाहरूको भनाइ छ। धार्मिक तथा पर्यटकीय सहरका रूपमा परिचित जनकपुरधाममा व्यवस्थित पार्किङ स्थलको अभाव र नियम कार्यान्वयनमा कमजोरी हुँदा समस्या झन् जटिल बन्दै गएको उनीहरूको तर्क छ।
स्थानीयवासीले ट्राफिक प्रहरीले नियमित अनुगमन, अवैध पार्किङमाथि कडाइ तथा नगरपालिकाले व्यवस्थित पार्किङ क्षेत्रको व्यवस्था गर्नुपर्ने माग गरेका छन्। अन्यथा ट्राफिक अव्यवस्था, दुर्घटनाको जोखिम र सर्वसाधारणको सास्ती अझ बढ्दै जाने उनीहरूको चेतावनी छ। जनकपुरधाममा बढ्दो सवारी चापलाई व्यवस्थापन गर्न सम्बन्धित निकायले समयमै प्रभावकारी कदम चाल्नुपर्ने आवश्यकता देखिएको छ।
