सर्लाही जेठ २२ ।रानी कुमारी गुप्ता । सर्लाही, बसबरिया । सर्लाही जिल्लाको बसबरिया गाउँपालिका–३ भवानीपुरमा श्री रामजानकी मन्दिर निर्माणका लागि भूमि पूजन कार्यक्रम भव्य रूपमा सम्पन्न भएको छ। नेपाली कांग्रेसका चर्चित युवा नेता सुरेन्द्र सिंहको करकोमल हाथबाट भुमि पुजन भएको छ ।
धार्मिक तथा सांस्कृतिक महत्व बोकेको श्री रामजानकी मन्दिर निर्माण कार्यको शुभारम्भ भूमि पूजनमार्फत गरिएको हो। कार्यक्रममा बोल्दै नेता सुरेन्द्र सिंहले धार्मिक आस्था, सामाजिक सद्भाव र सांस्कृतिक पहिचानको संरक्षणका लागि मन्दिर निर्माण महत्वपूर्ण कदम भएको बताउनुभयो। उहाँले मन्दिर निर्माणले स्थानीय समुदायलाई एकताबद्ध गर्न र धार्मिक गतिविधिलाई थप सशक्त बनाउन सहयोग पुग्ने विश्वास व्यक्त गर्नुभयो।
धार्मिक तथा सामाजिक विकासका कार्यहरूमा सबै पक्षको सहयोग आवश्यक रहेको बताउँदै मन्दिर निर्माण कार्य समयमै सम्पन्न गर्न आफूहरूको पूर्ण सहयोग रहने प्रतिबद्धता व्यक्त गर्नुभयो।
स्थानीय बासिन्दाहरूले पनि मन्दिर निर्माण कार्यप्रति खुशी व्यक्त गर्दै यसले गाउँको धार्मिक तथा सांस्कृतिक महत्व बढाउने विश्वास व्यक्त गरेका छन्। उनीहरूले लामो समयदेखि व्यवस्थित मन्दिरको आवश्यकता महसुस भइरहेको अवस्थामा निर्माण कार्य सुरु हुनु सकारात्मक उपलब्धि भएको बताएका छन्।
भूमि पूजन कार्यक्रम वैदिक विधिअनुसार सम्पन्न गरिएको थियो। पुजारीद्वारा विशेष पूजा, मन्त्रोच्चारण तथा धार्मिक अनुष्ठान गरिनुका साथै सहभागीहरूले मन्दिर निर्माण सफलताको कामना गरेका थिए।
स्थानीयवासीका अनुसार मन्दिर निर्माण सम्पन्न भएपछि भवानीपुर क्षेत्र धार्मिक पर्यटनको दृष्टिले समेत आकर्षणको केन्द्र बन्न सक्ने अपेक्षा गरिएको छ। मन्दिर निर्माण कार्यलाई समुदायको साझा अभियानका रूपमा अगाडि बढाइने आयोजकहरूले बताएका छन्।
आयोजित उक्त कार्यक्रममा स्थानीयवासी, जनप्रतिनिधि, राजनीतिक दलका नेता–कार्यकर्ता तथा समाजसेवी हरूको उल्लेखनीय सहभागिता रहेको थियो।
