जनकपुर , जेठ १७ —रानी कुमारी गुप्ता । मधेश प्रदेश सरकारका गृह, सञ्चार तथा कानून मन्त्री फकिरा महतो ले महोत्तरी जिल्लाको गौशाला नगरपालिका वडा नं. ३ स्थित श्री निगौल गाई गौशालाको अनुगमन गरेका छन्।
अनुगमनका क्रममा मन्त्री महतोले गौशालाको वर्तमान अवस्था, व्यवस्थापन पक्ष, सञ्चालनमा देखिएका चुनौती तथा भावी योजनाबारे जानकारी लिएका थिए। उनले गौशाला व्यवस्थापन समितिका पदाधिकारी, स्थानीय जनप्रतिनिधि तथा सरोकारवालाहरूसँग छलफल गर्दै संस्थाको प्रभावकारी सञ्चालनका लागि प्रदेश सरकार सकारात्मक रहेको बताएका छन्।
मन्त्री महतोले गौशालाले स्थानीय स्तरमा गाई संरक्षण, कृषि तथा धार्मिक–सांस्कृतिक महत्वको संरक्षणमा महत्वपूर्ण भूमिका निर्वाह गरिरहेको बताउदै देखिएका समस्याहरूको समाधानका लागि आवश्यक सहजीकरण गर्ने प्रतिबद्धता व्यक्त गरे। उनले प्रदेश सरकार जनताको आवश्यकतासँग प्रत्यक्ष जोडिएका संस्थाहरूको संरक्षण र सुदृढीकरणमा केन्द्रित रहेको समेत बताए।
कार्यक्रममा गौशाला नगरपालिकाका नगरप्रमुख डा. दिपेन्द्र महतो को विशेष सहभागिता रहेको थियो। नगरप्रमुख महतोले गौशालाको विकास, पूर्वाधार विस्तार तथा व्यवस्थापन सुधारका लागि स्थानीय तह र प्रदेश सरकारबीच समन्वय आवश्यक रहेको धारणा राखे। उनले गौशालाको दीर्घकालीन व्यवस्थापनका लागि आवश्यक बजेट तथा प्राविधिक सहयोग उपलब्ध गराउन प्रदेश सरकारसँग आग्रह समेत गरे।
अनुगमन तथा छलफल कार्यक्रममा स्थानीय बुद्धिजीवी, समाजसेवी, गौशाला व्यवस्थापन समितिका प्रतिनिधि तथा विभिन्न क्षेत्रका सरोकारवालाहरूको उल्लेखनीय उपस्थिति रहेको थियो। सहभागीहरूले गौशालाको व्यवस्थापनमा देखिएका विभिन्न समस्याहरू, भौतिक पूर्वाधारको अभाव, पशु आहार व्यवस्थापन तथा आर्थिक स्रोतको चुनौतीबारे मन्त्रीसमक्ष ध्यानाकर्षण गराएका थिए।
छलफलपछि मन्त्री महतोले उठाइएका विषयहरूलाई प्रदेश सरकारको ध्यानाकर्षण गराइ आवश्यक पहल गर्ने आश्वासन दिएका छन्। उनले स्थानीय तह, प्रदेश सरकार तथा समुदायबीचको सहकार्यबाट मात्र यस्ता धार्मिक तथा सामाजिक महत्वका संस्थाहरूलाई थप व्यवस्थित र प्रभावकारी बनाउन सकिने बताए।
मन्त्री महतोको यस अनुगमनलाई स्थानीयवासीहरूले सकारात्मक रूपमा लिएका छन्। उनीहरूले गौशालाको संरक्षण, व्यवस्थापन सुधार तथा आवश्यक स्रोत–साधन उपलब्ध गराउन प्रदेश सरकारको सक्रिय भूमिका रहने अपेक्षा व्यक्त गरेका छन्।
