जनकपुर रानी कुमारी गुप्ता । मधेश प्रदेश सरकारका गृह, सञ्चार तथा कानून मन्त्री माननीय श्री फकिरा महतोको उपस्थितिमा बारा जिल्ला अदालतमा अनुगमन तथा निरीक्षण कार्यक्रम सम्पन्न गरिएको छ।
कार्यक्रममा बारा जिल्ला अदालतका मुख्य न्यायाधीश, पर्सास्थित उच्च अदालतका मुख्य न्यायाधीश, विभिन्न न्यायाधीशहरू, प्रमुख जिल्ला अधिकारी, सुरक्षा निकायका प्रमुखहरू, रजिस्ट्रार, श्रेस्तेदार लगायत सरोकारवाला अधिकारीहरूको सहभागिता रहेको थियो।
अनुगमनका क्रममा अदालतको सेवा प्रवाह, न्यायिक प्रशासन, अभिलेख व्यवस्थापन, सुरक्षाको अवस्था तथा सेवाग्राहीलाई प्रदान गरिने सुविधाबारे विस्तृत जानकारी लिइएको थियो। सहभागीहरूले अदालतको भौतिक पूर्वाधार, कर्मचारी व्यवस्थापन, मुद्दा फर्छ्यौटको अवस्था तथा न्याय सम्पादन प्रक्रियाका विविध पक्षहरूको अवलोकन गरेका थिए।
गृह, सञ्चार तथा कानून मन्त्री फकिरा महतोले न्यायपालिकाप्रति नागरिकको विश्वास कायम राख्न प्रभावकारी, पारदर्शी र छिटोछरितो सेवा प्रवाह आवश्यक रहेको बताउनुभयो। उहाँले अदालत र सुरक्षा निकायबीचको समन्वयलाई थप सुदृढ बनाउँदै नागरिकमैत्री न्यायिक वातावरण निर्माण गर्न प्रदेश सरकार प्रतिबद्ध रहेको धारणा व्यक्त गर्नुभयो।
कार्यक्रममा उपस्थित न्यायाधीश तथा प्रशासनिक अधिकारीहरूले न्यायिक सेवाको गुणस्तर अभिवृद्धि, अदालतको कार्यसम्पादनलाई थप प्रभावकारी बनाउने उपाय तथा देखिएका समस्याको समाधानका विषयमा छलफल गरेका थिए। सुरक्षा निकायका प्रमुखहरूले अदालत परिसरको सुरक्षा अवस्था र आवश्यक सुधारका विषयमा जानकारी गराएका थिए।
अनुगमन तथा निरीक्षण कार्यक्रमले अदालतको सेवा प्रवाहलाई थप प्रभावकारी, व्यवस्थित र सेवामुखी बनाउन सहयोग पुग्ने विश्वास सहभागीहरूले व्यक्त गरेका छन्। साथै न्यायिक क्षेत्रका चुनौतीहरू पहिचान गरी समाधानका लागि सम्बन्धित निकायबीच आवश्यक समन्वय र सहकार्यलाई निरन्तरता दिने प्रतिबद्धता समेत व्यक्त गरिएको छ।
