जनकपुरधाम ।जेठ १३। रानी कुमारी गुप्ता । मधेश प्रदेश सरकारले आगामी आर्थिक वर्ष २०८३–८४ को नीति तथा कार्यक्रम १५ जेठमा सार्वजनिक गर्ने भएको छ । बुधबार बसेको प्रदेश मन्त्रिपरिषद् बैठकले सो मितिमा नीति तथा कार्यक्रम प्रस्तुत गर्ने निर्णय गरेको हो ।
प्रदेश प्रमुख डा. सुरेन्द्रलाल कर्ण ले १५ जेठ दिउँसो १ बजे बस्ने प्रदेश सभाको बैठकमा सरकारको नीति तथा कार्यक्रम प्रस्तुत गर्ने कार्यक्रम तय गरिएको छ । आगामी आर्थिक वर्षको नीति तथा कार्यक्रममा गरिबी न्यूनीकरण, रोजगारी सिर्जना, आर्थिक वृद्धि तथा प्रदेशको समग्र विकासलाई मुख्य प्राथमिकतामा राखिएको सरकारले जनाएको छ ।
नीति तथा योजना आयोगका उपाध्यक्ष राजकुमार सिंह का अनुसार प्रदेशको जीडीपी वृद्धि, उत्पादनमूलक क्षेत्रको प्रवर्द्धन तथा आर्थिक गतिविधि विस्तार गर्ने उद्देश्यका साथ कार्यक्रमहरू समावेश गरिनेछ । उनले बहुवर्षीय तथा गौरवका आयोजनाहरूलाई निरन्तरता दिँदै विगतदेखि अधुरा रहेका योजनाहरू सम्पन्न गर्ने दिशामा सरकार केन्द्रित रहने बताए ।
त्यसैगरी शिक्षा तथा स्वास्थ्य क्षेत्रलाई पनि विशेष प्राथमिकतामा राखिएको जनाइएको छ । नमुना विद्यालयहरूमा आवासीय सुविधाको व्यवस्था गर्ने, गुणस्तरीय शिक्षा प्रवाह गर्ने तथा नागरिकलाई सहज, सुलभ र सर्वसुलभ स्वास्थ्य सेवा उपलब्ध गराउने योजनालाई नीति तथा कार्यक्रममा समेटिने तयारी गरिएको छ ।
प्रदेश सरकारले आगामी नीति तथा कार्यक्रममार्फत विकास निर्माणका कामलाई प्रभावकारी बनाउने, रोजगारीका अवसर वृद्धि गर्ने तथा जनतामुखी कार्यक्रम अघि सार्ने अपेक्षा गरिएको छ । आगामी आर्थिक वर्षको बजेट तथा कार्यक्रमले मधेश प्रदेशको आर्थिक तथा सामाजिक विकासमा नयाँ दिशा दिने विश्वास गरिएको छ ।
