काठमाडौँ । जेठ १३ ।लोकतन्त्रवादी पत्रकारहरूको साझा संस्था नेपाल प्रेस युनियनले आज देशभर विभिन्न कार्यक्रम आयोजना गरी आफ्नो ३५औँ स्थापना दिवस मनाउँदै छ। स्थापना दिवसको अवसरमा युनियनका जिल्ला तथा शाखा समितिहरूले विविध कार्यक्रम सञ्चालन गरेका छन् भने केन्द्रीय समितिले काठमाडौँमा विधान महाधिवेशन आयोजना गरेको छ।
युनियनका अध्यक्ष शिव लम्सालका अनुसार महाधिवेशनको पूर्वसन्ध्यामा बिहान ७ बजे माइतीघर मण्डलामा प्रभातफेरी कार्यक्रम आयोजना गरिनेछ। त्यसपछि बिहान ९ बजेदेखि विधान महाधिवेशन सुरु हुने कार्यक्रम तय गरिएको छ। महाधिवेशनको उद्घाटन नेपालको प्रथम राष्ट्रपति डा. रामवरण यादवले गर्ने कार्यक्रम रहेको युनियनले जनाएको छ।
युनियनका उपाध्यक्ष जीवन भण्डारीका अनुसार विधान महाधिवेशनका लागि देशभरका शाखाबाट अध्यक्ष, सचिव, कोषाध्यक्ष तथा प्रतिनिधिहरू काठमाडौँ आइपुगेका छन्। महाधिवेशनमार्फत युनियनको विधान परिमार्जन तथा संगठनलाई थप सुदृढ बनाउने विषयमा छलफल हुने जनाइएको छ।
वि.सं. २०४८ साल जेठ १३ गते श्रमजीवी पत्रकारहरूको हकहित संरक्षण गर्ने उद्देश्यसहित ट्रेड युनियन आन्दोलनको जगमा नेपाल प्रेस युनियनको स्थापना भएको थियो। स्थापना कालमा पूर्वमन्त्री तथा पत्रकार जेपी गुप्ता संयोजक रहेको तदर्थ समिति गठन गरिएको थियो।
नेपाल प्रेस युनियनले स्थापना कालदेखि नै प्रेस स्वतन्त्रता, लोकतान्त्रिक मूल्य–मान्यता तथा श्रमजीवी पत्रकारहरूको अधिकारका पक्षमा आवाज उठाउँदै आएको छ। महासचिव दिलीप पौडेलले युनियनले मिडियामैत्री नीति निर्माण तथा पत्रकारहरूको पेशागत सुरक्षाका लागि निरन्तर नेतृत्वदायी भूमिका निर्वाह गर्दै आएको बताएका छन ।
