रौतहट ।जेठ १३ । भारतसँग जोडिएका रौतहटका विभिन्न सीमावर्ती नाकाबाट दैनिक रूपमा भइरहेको अवैध तस्करीले सुरक्षा व्यवस्थामाथि गम्भीर प्रश्न उठाएको छ । गौर, बंकुल, लक्ष्मीपुर–बेलबिछवा, रामपुरखाप लगायतका नाकाबाट चिनी, कपडा, मोटरपार्ट्स, सुर्तीजन्य सामग्री, कुखुरा, मदिरा तथा भैंसीजस्ता सामान खुलेआम नेपाल भित्रिरहेको स्थानीयवासीले बताएका छन् ।
सीमामा सशस्त्र प्रहरी, नेपाल प्रहरी तथा अन्य सुरक्षा निकायको उपस्थिति हुँदाहुँदै पनि तस्करी नियन्त्रण हुन नसक्नुले स्थानीय तहदेखि सर्वसाधारणसम्म आक्रोश बढेको छ । स्थानीयका अनुसार केही संगठित तस्कर समूहले सीमाक्षेत्रमा “लाइन” सञ्चालन गर्दै अवैध सामान सहज रूपमा नेपाल भित्र्याइरहेका छन् ।
स्थानीय स्रोतका अनुसार भारतबाट भित्राइएका अवैध सामान गरुडा र चन्द्रनिगाहपुर हुँदै देशका विभिन्न जिल्लासम्म पुर्याइने गरिएको छ । रातिको समयमा मात्र नभई दिउँसै समेत मोटरसाइकल, टेम्पो र साना मालवाहक सवारी प्रयोग गरेर सामान ओसारपसार भइरहेको आरोप छ ।
सीमावर्ती क्षेत्रका बासिन्दाले सुरक्षा निकायको मिलेमतोबिनै यति ठूलो परिमाणमा तस्करी सम्भव नहुने दाबी गरेका छन् । “सुरक्षाकर्मीको आँखा अगाडि नै सामान वारपार भइरहेको छ, तर नियन्त्रण भएको देखिँदैन,” एक स्थानीयले भने, “यदि सुरक्षा निकाय नै मौन बस्ने हो भने कानुन कसका लागि लागू हुन्छ ?”तस्करीका कारण राज्यले दैनिक लाखौं रुपैयाँ राजस्व गुमाइरहेको अनुमान गरिएको छ । वैध रूपमा व्यवसाय सञ्चालन गर्दै आएका व्यापारीहरू समेत अवैध सामानका कारण मारमा परेको गुनासो गर्छन् । सस्तो मूल्यमा तस्करीका सामान बजारमा पुग्दा कानुनी रूपमा कर तिरेर व्यापार गर्ने व्यवसायी प्रतिस्पर्धामा कमजोर बन्दै गएको उनीहरूको भनाइ छ ।
स्थानीय नागरिक तथा सरोकारवालाहरूले सीमाक्षेत्रमा प्रभावकारी अनुगमन, सुरक्षा निकायमाथि निष्पक्ष छानबिन तथा तस्करी नियन्त्रणका लागि कडा कारबाहीको माग गरेका छन् । उनीहरूले सीमामा हुने अवैध गतिविधि रोक्न राज्यले विशेष अभियान सञ्चालन गर्नुपर्ने आवश्यकता औंल्याएका छन् ।
यता सुरक्षा निकायले भने तस्करी नियन्त्रणका लागि नियमित गस्ती र निगरानी जारी रहेको दाबी गर्दै आएको छ । तर सीमावर्ती क्षेत्रमा तस्करी नरोकिएको अवस्थाले सरकारी दाबीमाथि नै प्रश्न चिन्ह खडा गरेको छ ।
