जनकपुरधाम जेठ १२ ।रानी कुमारी गुप्ता ।मधेश प्रदेश सरकारको मन्त्रिपरिषद् विस्तार गर्दै मुख्यमन्त्री कृष्ण प्रसाद यादव ले विभिन्न दलका नेताहरूलाई समेटेर नयाँ मन्त्री नियुक्त गरेका छन् । प्रदेश प्रमुख सुरेन्द्र लाभ ले मुख्यमन्त्रीको सिफारिसमा पाँच जना मन्त्रीलाई नियुक्त गर्दै सरकारलाई थप पूर्णता दिएका हुन् ।
नयाँ मन्त्रिपरिषद् गठनअनुसार नेकपाका युवराज भट्टराई लाई अर्थ मन्त्रालयको जिम्मेवारी दिइएको छ । त्यस्तै नेकपा एमालेका मोहम्मद समिर भौतिक पूर्वाधार विकास मन्त्री बनेका छन् ।
यसैगरी शारदा देवी थापा लाई श्रम तथा यातायात मन्त्रालयको जिम्मेवारी दिइएको छ भने लखन दास युवा तथा समाज कल्याण मन्त्री नियुक्त भएका छन् । एमालेकै मनोज सिंह ले शिक्षा तथा संस्कृति मन्त्रालयको नेतृत्व सम्हाल्ने भएका छन् ।
उता नेपाली कांग्रेसबाट नगेन्द्र शाह लाई स्वास्थ्य मन्त्रालयको जिम्मेवारी दिइएको छ । सत्ता साझेदार दलहरूबीच लामो छलफलपछि मन्त्रालय बाँडफाँट टुंगिएको जनाइएको छ ।
नवनियुक्त सबै मन्त्रीहरूले बुधबार नै पद तथा गोपनीयताको शपथ ग्रहण गरेका छन् । सरकार विस्तारसँगै मधेश प्रदेशमा राजनीतिक समीकरण थप मजबुत हुने अपेक्षा गरिएको छ । साथै प्रदेश सरकारका अधुरा योजना र विकास निर्माणका कामले अब गति लिने विश्वास समेत व्यक्त गरिएको छ ।
