जनकपुरधाम जेठ १२ ।रानी कुमारी गुप्ता । प्रादेशिक अस्पताल जनकपुरधाम मा चिकित्सकहरूको पेनडाउन आन्दोलन जारी रहँदा उपचार सेवा प्रभावित बनेको छ । अस्पतालको ओपिडी तथा विभिन्न वार्डको सेवा अवरुद्ध हुँदा दैनिक सयौँ बिरामी समस्यामा परेका छन् ।
एक सुत्केरी महिलाको उपचारका क्रममा मृत्यु भएपछि घटनामा संलग्न चिकित्सकलाई कारबाही गर्न माग गर्दै मृतक पक्ष र केही युवाले अस्पताल परिसरमा प्रदर्शन गरेका थिए । त्यसपछि सुरक्षाको अभाव र चिकित्सकमाथि दबाब बढेको भन्दै चिकित्सक तथा कर्मचारीहरू पेनडाउनमा उत्रिएका हुन् । आन्दोलन लगातार तेस्रो दिनसम्म पुग्दा अस्पतालको नियमित सेवा अस्तव्यस्त बनेको छ ।
अस्पताल प्रशासनले घटनापछि शल्यक्रियामा संलग्न दुई चिकित्सकलाई निलम्बन गरेको थियो । तर चिकित्सक संघले उपचारको क्रममा हुने जटिल घटनामा तत्काल निलम्बन गर्नु गलत भएको भन्दै विरोध जनाएको छ । संघले कुनै पनि घटनाको निष्पक्ष छानबिन विशेषज्ञ टोलीबाट हुनुपर्ने माग राखेको छ ।
पेनडाउनका कारण विशेषगरी ओपिडी सेवा बढी प्रभावित भएको छ । उपचारका लागि बिहानैदेखि लाइनमा बसेका धेरै बिरामी उपचार नपाई फर्किन बाध्य भएका छन् । कतिपय बिरामी निजी अस्पताल तथा क्लिनिकतर्फ जान थालेपछि उनीहरूलाई अतिरिक्त आर्थिक भार परेको छ ।
अस्पतालमा सीमित चिकित्सकले मात्रै आकस्मिक सेवा सञ्चालन गरिरहेका छन् । तर बिरामीको चाप अत्यधिक भएकाले सेवा व्यवस्थापन कठिन बनेको अस्पताल स्रोतले जनाएको छ । लामो समयसम्म उपचार नपाउँदा बिरामी र आफन्तमा आक्रोश बढ्दो छ ।
पेनडाउनमा सहभागी चिकित्सकहरूले हरेक उपचारजन्य जटिलतालाई चिकित्सकको लापरबाहीसँग जोडेर आन्दोलन गर्ने प्रवृत्तिले काम गर्ने वातावरण असुरक्षित बनेको बताएका छन् । उनीहरूले सुरक्षा सुनिश्चित नभएसम्म आन्दोलन जारी रहने चेतावनी दिएका छन् ।
यता केही बिरामीका आफन्तले भने आन्दोलनको आडमा बिरामीलाई निजी अस्पताल पठाउने प्रयास भइरहेको आरोप लगाएका छन् । यद्यपि अस्पताल प्रशासनले चिकित्सकहरूको सुरक्षालाई ध्यानमा राख्दै परिस्थिति सामान्य बनाउन प्रयास भइरहेको जनाएको छ
दुवै पक्षबीच प्रारम्भिक सहमति भइसके पनि सेवा अझै पूर्ण रूपमा सञ्चालनमा आउन नसक्दा अस्पतालको अवस्था तनावपूर्ण बनेको छ ।
