बारा, जेठ १२ । सुवर्ण गाउँपालिका वडा नं. २ स्थित कवही गाउँको गोठमा रहेको इटाहीं पोखरी परिसरभित्र अवस्थित श्री हनुमानजी मन्दिरको प्राङ्गणमा धर्मशाला भवनको शिलान्यास सम्पन्न गरिएको छ। गाउँपालिका प्रमुख राजेश प्रसाद यादव तथा उप-प्रमुख पुनम कुमारी यादव ले संयुक्त रूपमा भवनको शिलान्यास गर्नुभएको हो।
धार्मिक तथा सामाजिक महत्व बोकेको उक्त धर्मशाला निर्माण भएपछि मन्दिरमा आउने श्रद्धालु, साधुसन्त तथा विभिन्न धार्मिक कार्यक्रममा सहभागी हुने भक्तजनलाई सहजता हुने अपेक्षा गरिएको छ। स्थानीयवासीका अनुसार इटाहीं पोखरी क्षेत्रमा रहेको श्री हनुमानजी मन्दिर प्राचीन धार्मिक आस्थाको केन्द्रका रूपमा परिचित रहँदै आएको छ।
शिलान्यास कार्यक्रममा गाउँपालिका जनप्रतिनिधि, स्थानीय अगुवा, समाजसेवी, बुद्धिजीवी तथा सर्वसाधारणको उल्लेखनीय उपस्थिति रहेको थियो। कार्यक्रममा बोल्दै गाउँपालिका प्रमुख यादवले धार्मिक सम्पदाको संरक्षणसँगै स्थानीय पर्यटन प्रवर्द्धनमा समेत गाउँपालिकाले प्राथमिकता दिएको बताउनुभयो। उहाँले धर्मशाला निर्माणले धार्मिक गतिविधि थप व्यवस्थित हुने विश्वास व्यक्त गर्नुभयो।
उप-प्रमुख पुनम कुमारी यादवले धार्मिक तथा सांस्कृतिक धरोहरको संरक्षण स्थानीय सरकारको दायित्व भएको उल्लेख गर्दै सामुदायिक सहकार्यबाट विकासका कामलाई अगाडि बढाइने बताउनुभयो।
स्थानीयवासीले धर्मशाला निर्माण कार्यले मन्दिर परिसरको सौन्दर्य बढ्नुका साथै बाहिरबाट आउने भक्तजनलाई बसोबास तथा विश्राममा सुविधा पुग्ने अपेक्षा गरेका छन्। निर्माण कार्य निर्धारित समयमै सम्पन्न गर्ने लक्ष्य गाउँपालिकाले लिएको जनाएको छ।
