काठमाडौं ।जेठ १० । बजारमा क्यान्सर उपचारमा प्रयोग हुने प्लाटिनम समूहका औषधि तथा सलाइनको उपलब्धतासम्बन्धी समस्या देखिन थालेपछि औषधि व्यवस्था विभाग ले सम्बन्धित पक्षलाई दैनिक विवरण उपलब्ध गराउन आग्रह गरेको छ ।
विभागले अत्यावश्यक औषधिको आपूर्ति तथा मौज्दात अवस्थामाथि निरन्तर निगरानी गरिरहेको जनाएको छ ।
विभागले सार्वजनिक गरेको सूचनाअनुसार प्लाटिनम समूहका क्यान्सर उपचारमा प्रयोग हुने औषधि, सलाइन लगायत अत्यावश्यक औषधिको बजार उपलब्धतामा चुनौती देखिएपछि त्यसको व्यवस्थापनलाई प्राथमिकतामा राखिएको हो । विभागले औषधिको अभाव हुन नदिन उत्पादक, आयातकर्ता, अस्पताल तथा सरोकारवाला निकायसँग समन्वय गरी पर्याप्त आपूर्ति सुनिश्चित गर्ने प्रयास भइरहेको उल्लेख गरेको छ ।
हाल बजारमा केही औषधिको आपूर्ति असहज भएको गुनासो आएपछि विभागले वास्तविक अवस्था बुझ्न दैनिक विवरण संकलन प्रक्रिया सुरु गरेको जनाएको छ । विभागका अनुसार सम्बन्धित उत्पादक, आयातकर्ता तथा अस्पतालहरूले हरेक दिन बिहान १० बजेदेखि ११ बजेसम्म औषधिको मौज्दात, वितरण अवस्था, आयातको स्थिति तथा आगामी आपूर्तिसम्बन्धी यथार्थ विवरण उपलब्ध गराउनुपर्नेछ ।
सूचनामा अत्यावश्यक औषधिको नियमित आपूर्ति कायम राख्न सबै पक्षको सहकार्य आवश्यक रहेको उल्लेख गरिएको छ । विभागले बजारमा कृत्रिम अभाव सिर्जना हुन नदिन तथा बिरामीले उपचारमा समस्या भोग्न नपरोस् भन्ने उद्देश्यले अनुगमनलाई थप प्रभावकारी बनाइएको जनाएको छ ।
क्यान्सरजस्ता जटिल रोगको उपचारमा प्रयोग हुने प्लाटिनम समूहका औषधि अत्यन्त संवेदनशील र जीवनरक्षक मानिन्छन् । यस्ता औषधिको आपूर्तिमा समस्या आउँदा बिरामीको उपचारमा असर पर्न सक्ने भएकाले विभागले यसलाई गम्भीर रूपमा लिएको जनाएको छ ।
विभागले सम्पर्क तथा समन्वयका लागि सूचना अधिकारी किरण सुन्दर बज्राचार्य तथा नेपाल औषधि आयातकर्ता संघ का अध्यक्ष पवन आचार्यलाई सम्पर्क व्यक्तिका रूपमा तोकेको छ । आवश्यक जानकारी तथा विवरण उनीहरूमार्फत उपलब्ध गराउन विभागले आग्रह गरेको छ ।
स्वास्थ्य क्षेत्रका जानकारहरूले अत्यावश्यक औषधिको नियमित आपूर्ति सुनिश्चित गर्न सरकार, निजी क्षेत्र र अस्पतालबीच प्रभावकारी समन्वय आवश्यक रहेको बताएका छन् । बजारमा औषधि अभावको अवस्था दोहोरिन नदिन दीर्घकालीन योजना आवश्यक रहेको उनीहरूको भनाइ छ ।
