वीरगञ्ज जेठ १० ।हरि खेतान बहुमुखी क्याम्पस लाई निजीकरण गर्न खोजिएको भन्दै भइरहेका गतिविधिप्रति क्याम्पस प्रशासन र नागरिक समाजले गम्भीर चिन्ता व्यक्त गरेका छन्। क्याम्पस प्रमुख किशोरी राय यादव ले विद्यार्थी भर्नाको समय पारेर निजी क्षेत्रका कलेज सञ्चालकहरूको प्रभावमा क्याम्पसलाई सुनियोजित रूपमा बदनाम गर्ने प्रयास भइरहेको आरोप लगाएका छन्।
शनिबार जिल्ला समन्वय समिति पर्सा मा नागरिक समाजको अगुवाइमा आयोजित छलफल कार्यक्रममा बोल्दै यादवले हरि खेतान क्याम्पस सामुदायिक संस्थाकै रूपमा रहने स्पष्ट पारे। उनले क्याम्पसलाई शिक्षा माफियाको प्रभावबाट जोगाउन सबै सरोकारवालाले साझा रूपमा भूमिका खेल्नुपर्ने बताए।
बैठकमा पूर्व सांसद विचारी यादव, क्याम्पसका पूर्व प्रमुख डा. भगवान यादव, नेपाल बार एसोसिएसन का अध्यक्ष रामनारायण कुर्मी, जनता समाजवादी पार्टी नेपाल का अध्यक्ष रामनरेश यादव, नेकपा एमाले का नेता सुन्दर कुर्मी लगायतले क्याम्पसको वर्तमान अवस्थाबारे चिन्ता व्यक्त गरेका थिए।
क्याम्पस प्रमुख यादवले पूर्व प्रशासनमाथि समेत प्रश्न उठाउँदै विगतमा सीमित समूहको प्रभावमा सञ्चालक समिति सञ्चालन गरिएको आरोप लगाए। उनले २०८० असोज १९ गते संशोधन गरिएको विधान पूर्व क्याम्पस प्रमुखकै कार्यकालमा ल्याइएको उल्लेख गर्दै त्यसबारे सार्वजनिक बहस गर्न आफू तयार रहेको बताए।
यादवका अनुसार क्याम्पसको संरचना सुधार गर्न सकिने भए पनि कुनै हालतमा निजीकरण स्वीकार्य नहुने बताए। उनले गरिब तथा जेहेन्दार विद्यार्थीलाई छात्रवृत्ति उपलब्ध गराउने कार्यलाई समेत विवादित बनाउने प्रयास भइरहेको दाबी गरे।
यसैबीच क्याम्पस सञ्चालक समितिका सदस्य प्रकाश खेतान ले शैक्षिक वातावरण सुधारका लागि वीरगञ्जका नागरिक एकजुट हुनुपर्ने बताए। उनले विगतमा भ्रष्टाचार र अनियमितताको आरोप खेपेका व्यक्तिहरूबाट नागरिक समाज सचेत रहनुपर्ने धारणा राखे।
उता, वैशाख ३१ गते क्याम्पस प्रमुख किशोरी राय यादवमाथि कालोमोसो दलेको घटनामा संलग्न रहेको आरोपमा दिलीप पण्डित र देवलाल ठाकुर प्रहरी हिरासतमा रहेका छन्। घटनामा संलग्न भनिएका रवीन्द्र यादव, विकी गुप्ता र लालकिशोर पटेल भने अझै फरार रहेको प्रहरीले जनाएको छ ।
