जनकपुर ।रानी कुमारी । मधेस प्रदेश सरकारका गृहमन्त्री फकिरा महतो सहितको उच्चस्तरीय टोलीले जिल्ला अदालत सिरहाको अनुगमन गरेको छ । अनुगमन कार्यक्रममा उच्च अदालतका मुख्य न्यायाधीश, जिल्ला अदालत सिरहाका प्रमुख न्यायाधीश, प्रमुख जिल्ला अधिकारी, जिल्ला प्रहरी कार्यालय सिरहाका प्रमुख लगायत सुरक्षा तथा प्रशासनिक निकायका प्रतिनिधिहरूको सहभागिता रहेको थियो ।
अनुगमनका क्रममा अदालतको सेवा प्रवाह, मुद्दा फर्छ्योटको अवस्था, सेवाग्राहीलाई प्रदान गरिने सुविधालगायत न्याय सम्पादनसँग सम्बन्धित विषयमा छलफल गरिएको थियो । टोलीले अदालत परिसर, मुद्दा शाखा, हिरासत कक्ष तथा सेवाग्राही सहायता कक्षको समेत अवलोकन गरेको जनाएको छ ।
गृहमन्त्री महतोले न्याय सम्पादनलाई अझ प्रभावकारी, पारदर्शी र नागरिकमैत्री बनाउन प्रदेश सरकार आवश्यक सहयोग गर्न तयार रहेको बताउनुभयो । उहाँले अदालत र सुरक्षा निकायबीचको समन्वयलाई थप सुदृढ बनाउँदै नागरिकले सहज रूपमा न्याय पाउने वातावरण निर्माण गर्नुपर्नेमा जोड दिनुभयो ।
उच्च अदालतका मुख्य न्यायाधीशले अदालतमा देखिएका चुनौती, जनशक्ति अभाव तथा पूर्वाधार विकासका आवश्यकताबारे टोलीलाई जानकारी गराउनुभएको थियो । त्यस्तै जिल्ला अदालतका प्रमुख न्यायाधीशले पछिल्लो समय मुद्दाको चाप बढ्दै गएको उल्लेख गर्दै प्रभावकारी व्यवस्थापनका लागि आवश्यक स्रोतसाधनको आवश्यकता औँल्याउनुभयो ।
अनुगमन कार्यक्रममा प्रमुख जिल्ला अधिकारी तथा जिल्ला प्रहरी प्रमुखले जिल्लाको सुरक्षा अवस्था, अदालतसँगको समन्वय र कानुन कार्यान्वयनका विषयमा धारणा राखेका थिए । कार्यक्रममा सहभागीहरूले न्याय प्रणालीप्रति नागरिकको विश्वास अभिवृद्धि गर्न सबै निकायबीच सहकार्य आवश्यक रहेको बताएका छन् ।
