पर्सा जेठ ९ । पर्सा जिल्लाको वीरगञ्ज महानगरपालिकामा दुग्धजन्य पदार्थको गुणस्तर तथा उपभोक्ताको स्वास्थ्य सुरक्षालाई केन्द्रमा राख्दै संयुक्त बजार अनुगमन गरिएको छ। वाणिज्य, आपूर्ति तथा उपभोक्ता संरक्षण कार्यालय वीरगञ्ज र खाद्य प्रविधि तथा गुण नियन्त्रण डिभिजन कार्यालयको संयुक्त टोलीले महानगरपालिका–१५ लक्ष्मनवा स्थित डेरी फ्रेस उद्योग तथा वडा नं. १७ स्थित फ्रेस पूजा घ्यू प्रोडक्टमा अनुगमन गरेको हो।
अनुगमनका क्रममा उद्योगहरूमा उत्पादन तथा बिक्री वितरण भइरहेका घ्यू लगायत दुग्धजन्य सामग्रीको गुणस्तर, सरसफाइ, लेबलिङ, उत्पादन प्रक्रिया तथा मापदण्डको अवस्थाबारे निरीक्षण गरिएको थियो। टोलीले उद्योग सञ्चालकहरूलाई आवश्यक खाद्य मापदण्डको पूर्ण पालना गर्न निर्देशन दिएको जनाएको छ।
अनुगमनमा सहभागी एक सदस्यका अनुसार फ्रेस पूजा घ्यू प्रोडक्टमा निरीक्षण गर्दा कुनै विशेष त्रुटि फेला परेको छैन। बजारमा बिक्री भइरहेका खाद्य सामग्री गुणस्तरीय र सुरक्षित बनाइराख्न नियमित अनुगमन आवश्यक रहेको टोलीले जनाएको छ।
संयुक्त अनुगमन टोलीमा खाद्य प्रविधि तथा गुण नियन्त्रण कार्यालयका निरीक्षण टोली संयोजक जगत प्रकाश चौधरी, सदस्य श्रवण कुमार साह, वाणिज्य कार्यालयका मधुरेश प्रसाद साह, उपभोक्ता प्रतिनिधि प्रकाश कुमार शाह, नेपाल पत्रकार महासंघ पर्सा शाखाका सहसचिव एस.के. चौरसिया तथा पत्रकार बैजु झा लगायतको सहभागिता रहेको थियो।
फ्रेस पूजा घ्यू प्रोडक्टका सञ्चालक राजाबाबु चौरसियाले आफ्नो उद्योगबाट उत्पादित घ्यू विशेषगरी पूजा–पाठमा प्रयोग हुने तथा डेरी फ्रेस उद्योगबाट उत्पादित घ्यू खान योग्य, शुद्ध र गुणस्तरीय रहेको बताए।
निरीक्षण अधिकृत सुनिल चौरसियाका अनुसार उपभोक्ताको स्वास्थ्यलाई प्राथमिकतामा राख्दै आगामी दिनमा पनि बजार अनुगमनलाई निरन्तरता दिइनेछ। साथै व्यवसायीहरूलाई खाद्य ऐन तथा नियमअनुसार उत्पादन र बिक्री वितरण गर्न आग्रह गरिएको छ ।
