बारा, जेठ ८। निजी तथा आवासीय विद्यालय अर्गनाइजेशन नेपाल (नेशनल प्याब्सन) बाराले आइतबार थप गरिएको सार्वजनिक बिदाले विद्यार्थीको शैक्षिक भविष्यमा नकारात्मक असर परेको भन्दै तत्काल पुनर्विचार गर्न सरकारसँग माग गरेको छ।
नेशनल प्याब्सन बाराका जिल्ला अध्यक्ष प्रभुलाल प्रसाद कुशवाहाले आइतबार बिदा दिने निर्णयका कारण विद्यार्थीको नियमित पठनपाठन प्रभावित भएको बताएका छन्। उनले अतिरिक्त बिदाले विद्यालयको शैक्षिक क्यालेन्डर नै अव्यवस्थित बन्दै गएको उल्लेख गर्दै यसबाट विद्यार्थीको सिकाइ स्तर कमजोर हुँदै गएको दाबी गरे।
उनका अनुसार एक दिनको अतिरिक्त बिदाले वार्षिक रूपमा ठूलो शैक्षिक क्षति हुने अवस्था सिर्जना भएको छ। “बारम्बार बिदा थपिँदा विद्यालयले समयमा कोर्स सम्पन्न गर्न सकिरहेका छैनन्। यसले विद्यार्थीको पढाइमा प्रत्यक्ष असर पारिरहेको छ,” उनले भने।अध्यक्ष कुशवाहाले देशका विभिन्न जिल्लाका स्थानीय तहहरूले विद्यार्थीको हितलाई प्राथमिकतामा राख्दै आइतबार पनि नियमित पठनपाठन सञ्चालन गरिसकेको उदाहरण प्रस्तुत गरे। तर, बारा जिल्लाका स्थानीय सरकार भने यस विषयमा अझै गम्भीर नदेखिएको भन्दै उनले असन्तुष्टि व्यक्त गरे।
उनले शिक्षा क्षेत्रलाई राजनीतिक वा प्रशासनिक प्रयोगको विषय बनाउन नहुने उल्लेख गर्दै विद्यार्थीको भविष्यलाई केन्द्रमा राखेर निर्णय लिनुपर्ने आवश्यकता औंल्याए। “शिक्षा सुधार गर्ने जिम्मेवारी बोकेका निकाय नै विद्यार्थीको भविष्य अन्धकारतर्फ धकेल्ने काममा लाग्नु दुःखद हो,” उनले बताए।
नेशनल प्याब्सन बाराले शैक्षिक गुणस्तर सुधारका लागि विद्यालय सञ्चालन दिन पर्याप्त हुनुपर्ने धारणा पनि सार्वजनिक गरेको छ। संगठनले स्थानीय सरकार, शिक्षा शाखा तथा सरोकारवाला निकायलाई विद्यार्थीमैत्री नीति अवलम्बन गर्न आग्रह गरेको छ।
यता अभिभावक तथा शिक्षकहरूले समेत निरन्तर बिदाले विद्यार्थीमा अध्ययनप्रतिको अनुशासन कमजोर बन्ने चिन्ता व्यक्त गरेका छन्। उनीहरूका अनुसार पढाइको समय घट्दै जाँदा पाठ्यक्रम पूरा गर्न हतार हुने र त्यसले सिकाइको गुणस्तरमा असर पर्ने खतरा बढेको छ।
शिक्षा क्षेत्रसँग सम्बन्धित सरोकारवालाहरूले अब विद्यालय सञ्चालन समय र सार्वजनिक बिदाको व्यवस्थापनबारे गम्भीर छलफल आवश्यक रहेको बताएका छन्। विशेषगरी स्थानीय तहहरूले विद्यार्थीको हितलाई केन्द्रमा राखेर व्यवहारिक निर्णय लिनुपर्ने आवाज बलियो बन्दै गएको छ।
