जनकपुरधाम — बैशाख ९ ।नेपाल पत्रकार महासंघको केन्द्रीय कार्यालयको निर्देशनअनुसार नेपाल पत्रकार महासंघ मधेश प्रदेशले सरकारले निर्णय गरेको सरकारी विज्ञापन नीतिविरुद्ध विरोध जनाउँदै मधेस प्रदेशको मुख्यमन्त्री कृष्णप्रसाद यादवलाई ज्ञापनपत्र बुझाएको छ।
पत्रकार महासंघ मधेश प्रदेशका सचिव हदिश खुद्दार को नेतृत्वमा गएको पत्रकारहरूको टोलीले बुधबार मधेस प्रदेशको मुख्यमन्त्री कार्यालयमा पुगेर उक्त ज्ञापनपत्र हस्तान्तरण गरेको हो। ज्ञापनपत्रमा सरकारले ल्याएको विज्ञापन नीति प्रेस स्वतन्त्रता, समान अवसर र मिडियाको दिगोपनामा प्रतिकूल असर पार्ने उल्लेख गरिएको छ।
महासंघले विज्ञापन वितरण प्रणाली पारदर्शी, समानुपातिक र मापदण्डमा आधारित हुनुपर्ने माग राखेको छ। हाल लागू गरिएको नीतिले सीमित मिडियालाई मात्र लाभ पुग्ने र साना तथा क्षेत्रीय सञ्चारमाध्यमहरूलाई विस्थापित गर्ने खतरा बढाएको महासंघको ठहर छ। विशेषगरी मधेश प्रदेशका स्थानीय मिडियाहरू सरकारी विज्ञापनबाट वञ्चित हुने अवस्था सिर्जना भएको भन्दै महासंघले गम्भीर चिन्ता व्यक्त गरेको छ।
ज्ञापनपत्र बुझ्दै मुख्यमन्त्री यादवले पत्रकारहरूको मागप्रति सरकार गम्भीर रहेको प्रतिक्रिया दिएका छन्। उनले विज्ञापन नीतिबारे उठेका प्रश्नहरू सम्बन्धित निकायसँग समन्वय गरेर समाधान खोज्ने प्रतिबद्धता व्यक्त गरेका छन्। साथै सञ्चार क्षेत्र लोकतन्त्रको महत्वपूर्ण आधार भएकाले यसको संरक्षण र प्रवर्द्धनमा सरकार प्रतिबद्ध रहेको बताए।
महासंघका पदाधिकारीहरूले भने वर्तमान नीतिमा संशोधन नभए थप आन्दोलनका कार्यक्रम घोषणा गर्न बाध्य हुने चेतावनी दिएका छन्। उनीहरूले विज्ञापन वितरणमा भेदभाव अन्त्य गर्न र सबै सञ्चारमाध्यमलाई समान अवसर सुनिश्चित गर्न सरकारसँग आग्रह गरेका छन्।
पत्रकार महासंघले देशभरका शाखाहरूलाई समेत यस विषयमा एकजुट भएर आवाज उठाउन आह्वान गरेको छ। सरकारी नीतिले प्रेस स्वतन्त्रता कमजोर बनाउने कुनै पनि प्रयास स्वीकार्य नहुने महासंघको स्पष्ट धारणा रहेको छ।
