बारा बैशाख ८ । सडक डिभिजन कार्यालय हेटौंडाले महेन्द्र राजमार्ग अन्तर्गत पथलैयादेखि चुरियामाईसम्म फैलिएका अनधिकृत संरचनाहरू हटाउन पुनः कडा चेतावनी दिएको छ। कार्यालयले सडक सीमाभित्र बनेका घर, टहरा तथा अन्य संरचनाहरू तीन दिनभित्र हटाउन अल्टिमेटम जारी गरेको हो।
यसअघि पनि विभिन्न मितिमा सूचना जारी गरिँदा समेत अटेर गरिएको भन्दै कार्यालयले वैशाख १० गतेसम्म अन्तिम समयसीमा तोकेको जनाएको छ। २०७३ मंसिर १८ र २०८० असार ९ गते समेत यस्तै प्रकृतिका सूचना जारी गरिए पनि स्थानीयस्तरमा त्यसको पालना नभएकाले पुनः अन्तिम सूचना जारी गर्नुपरेको कार्यालयको भनाइ छ।
डिभिजन प्रमुख गुरुप्रसाद अधिकारीद्वारा वैशाख ७ गते जारी सूचनामा पथलैया–चुरियामाई सडकखण्ड अन्तर्गत ३ नम्बर पुलदेखि चुरियामाई मन्दिर क्षेत्रसम्म सडकको केन्द्रबिन्दुबाट दायाँ–बायाँ २५/२५ मिटरभित्र पर्ने सम्पूर्ण संरचना हटाउन स्पष्ट निर्देशन दिइएको छ। उक्त क्षेत्र सार्वजनिक सडक सीमाभित्र पर्ने भएकाले त्यहाँ कुनै पनि प्रकारको निजी निर्माण अवैध मानिने उल्लेख गरिएको छ।
कार्यालयका अनुसार सडक विस्तार, मर्मत तथा यातायात सञ्चालनलाई सहज बनाउनका लागि यस्तो कदम चालिएको हो। सडक किनारामा जथाभावी बनेका संरचनाले दुर्घटनाको जोखिम बढाउनुका साथै यातायात व्यवस्थापनमा समस्या सिर्जना गर्दै आएको बताइएको छ।
सूचनामा तोकिएको समयभित्र स्वेच्छिक रूपमा संरचना नहटाए कानुनी कारबाही अघि बढाइने चेतावनी दिइएको छ। सार्वजनिक सडक ऐन, २०३१ तथा प्रचलित अन्य कानुन अनुसार बल प्रयोग गरेर पनि संरचना हटाइने र सम्बन्धित व्यक्तिबाट क्षतिपूर्ति समेत असुल गरिने जनाइएको छ।
स्थानीय बासिन्दालाई समयमै सचेत भई आफ्ना संरचना हटाउन आग्रह गर्दै कार्यालयले अटेर गरेमा थप कडाइ गरिने संकेत दिएको छ। यस कदमले आगामी दिनमा सडक क्षेत्रको अतिक्रमण नियन्त्रणमा सहयोग पुग्ने विश्वास लिइएको छ।
