जनकपुर बैशाख ८ । सीमानाकामा हुने तस्करी गतिविधिमा प्रहरीको संलग्नता रहेको आशंका बढ्दै जाँदा मोबाइलसंवादहरू क्रमशःसार्वजनिक हुन थालेका छन्। पछिल्लो घटनाक्रमले मधेश प्रदेश प्रहरीको कार्यशैलीमाथि गम्भीर प्रश्न उठाएको छ।
सप्तरीमा प्रहरी उपरीक्षक (एसपी) गौतमकुमार केसीले सर्वसाधारणलाई फोनमार्फत गालीगलौज र धम्की दिएको अडियो सार्वजनिक भएपछि विवाद चर्किएको थियो। त्यसलगत्तै धनुषामा तस्कर र प्रहरीबीच आर्थिक लेनदेन मिलाउने विषयमा भएको अर्को संवाद बाहिरिएपछि प्रकरण थप जटिल बनेको छ।
सप्तरी घटनाको छानबिनका लागि मधेश प्रदेश प्रहरी कार्यालयले एसएसपी कमल थापाको नेतृत्वमा पाँच सदस्यीय समिति गठन गरेको छ। उक्त समितिलाई घटनाको सत्यतथ्य पत्ता लगाएर आवश्यक कारबाही सिफारिस गर्ने जिम्मेवारी दिइएको छ।
यता धनुषामा भने प्रहरीभित्रै आर्थिक लेनदेनको विषयमा विवाद सतहमा आएको छ। डीआईजी गोविन्द थपलियाको नाम जोडिएको अडियो बाहिरिएपछि तस्करीसँग सम्बन्धित रकम असुली र बाँडफाँटबारे नयाँ तथ्यहरू खुल्न थालेका छन्। उक्त संवादमा तस्कर राजीव महासेठले आफू र अन्य व्यापारीबाट उठाइएको रकम डीआईजीले तोकेका प्रहरीमार्फत बुझाइएको दाबी गरेको सुनिन्छ।
घटनापछि जिल्ला प्रहरी कार्यालय धनुषाका वरिष्ठ सई सागरसमशेर राणालाई निलम्बन गरिएको छ। उनलाई प्रारम्भिक रूपमा दोषी ठहर गर्दै कारबाही प्रक्रिया अघि बढाइएको प्रहरी स्रोतले जनाएको छ। तर राणाले भने आफूलाई फसाउन खोजिएको दाबी गर्दै आरोप अस्वीकार गरेका छन्।
यस प्रकरणमा अन्य प्रहरी कर्मचारीहरूको समेत नाम जोडिएको छ। विशेषगरी सई जयलाल यादव र गोपाल थापा मगरमाथि तस्करीसँग सम्बन्धित असुलीमा संलग्न भएको आरोप लागिरहेको छ। स्रोतका अनुसार तस्कर महासेठमार्फत दैनिक ठूलो मात्रामा अवैध सामान ओसारपसार हुने गरेको बताइएको छ।
उता सप्तरीमा सार्वजनिक अडियोमा एसपी केसीले स्थानीयलाई धम्की दिएको आरोप लागेको छ। स्थानीय सञ्चारकर्मी प्रह्लाद सिंहसँगको संवादमा उनले अपशब्द प्रयोग गरेको सुनिएपछि चौतर्फी आलोचना भइरहेको छ। पीडित पक्षले निष्पक्ष छानबिन र दोषीमाथि कारबाहीको माग गरेको छ।
यद्यपि एसपी केसीले भने आफूले गालीगलौज नगरेको दाबी गरेका छन्। समग्र घटनाले सीमावर्ती क्षेत्रमा तस्करी नियन्त्रणमा प्रहरीको भूमिकामाथि गम्भीर प्रश्न उठाएको छ।
