बारा वैशाख —८। सीमावर्ती क्षेत्रमा भन्सार कडाइसँगै सर्वसाधारणमाथि हुने व्यवहारप्रति जनआक्रोश बढ्दै गएको छ। विशेषगरी दैनिक उपभोगका सामान ल्याउने गरिब तथा निमुखा नागरिकहरू भन्सारमा अनावश्यक झन्झट र दुर्व्यवहार भोग्न बाध्य भएको गुनासो गर्दै आएका छन्।
यसै सन्दर्भमा एक वृद्ध आमाले आफूले “गरिबको पार्टी” ठानेर विश्वासका साथ भोट दिएको तर अहिले दैनिक जीवन झन् कष्टकर बनेको भन्दै गहिरो पछुतो व्यक्त गरेकी छिन्। उनका अनुसार चुनावका बेला जनताको पक्षमा काम गर्ने आशा गरिएको भए पनि व्यवहारमा भने उल्टै दुःख थपिएको छ। “हामीले भरोसा गर्यौं, तर अहिले त झन् बाँच्नै गाह्रो भयो,” उनले आक्रोश पोखिन्।
स्थानीयका अनुसार भारतको बैरगनिया, रक्सौल, छडादानो र मधेसको अन्य जिल्लाको नाका लगायतका बजारबाट घरायसी प्रयोजनका लागि सानो–तिनो सामान किनेर ल्याउँदा समेत भन्सारमा खटिएका प्रहरी तथा कर्मचारीले कडाइ गर्ने, अशोभनीय शब्द प्रयोग गर्ने र कहिलेकाहीँ सामानसमेत जफत गरेर भन्सार बुझाउने गरेका छन्। यसले गर्दा दैनिक गुजारा चलाउनै कठिन भएको उनीहरूको भनाइ छ।
सीमावर्ती क्षेत्रका बासिन्दाले सामान्य उपभोगका वस्तु ल्याउँदा पनि अपराधीसरह व्यवहार सहनुपरेको भन्दै असन्तुष्टि जनाएका छन्। “सानो सामान ल्याउँदा पनि हप्काउने, गाली गर्ने र दुःख दिने काम भइरहेको छ,” एक स्थानीयले भने, “यसरी त जनतालाई सहजता होइन, झन् पीडा थपिएको छ।”
भन्सार क्षेत्रमा बढ्दो कडाइ र व्यवहारगत समस्याले जनतामा निराशा र आक्रोश दिनप्रतिदिन बढ्दै गएको देखिन्छ। स्थानीयहरूका अनुसार यस्तो अवस्थाले सरकारप्रतिको विश्वास कमजोर बनाउँदै लगेको छ। उनीहरूले राज्यले राजस्व संकलनको नाममा सर्वसाधारणलाई दुःख दिने होइन, सहज र सम्मानजनक वातावरण सिर्जना गर्नुपर्ने माग गरेका छन्।
यस विषयमा सम्बन्धित निकायले आवश्यक सुधार नगरे जनअसन्तुष्टि थप चर्किने संकेत देखिएको छ। सीमावर्ती क्षेत्रमा बसोबास गर्ने नागरिकहरूलाई लक्षित गरी व्यवहार सुधार र नीतिगत सहजता आवश्यक रहेको स्थानीयहरूको जोड छ।नाकामा जनतालाई सास्ती र तस्करलाई छुट पाएको छ ।समेत गुनासो गरेका छन।
