बारा वैशाख ७ ।बारा जिल्लाको सदरमुकाम कलैयामा खसीको मासुको मूल्य पुनः निर्धारण गरिएको छ। स्थानीय बजारको अवस्था, आपूर्ति र व्यवसायीहरूसँगको छलफललाई आधार मान्दै बारा उद्योग वाणिज्य संघले नयाँ मूल्य सार्वजनिक गरेको हो।
आईतबार संघका (वाणिज्य) उपाध्यक्ष प्रदीप कुमार साह (गोल्डेन)को अध्यक्षतामा बसेको बैठकले मासु व्यवसायीहरूसँग समन्वय गरी मूल्य समायोजन गर्ने निर्णय गरेको जनाएको छ। पछिल्लो समय बजारमा खसीको मासुको मूल्यमा असन्तुलन देखिएको गुनासो बढ्दै गएकाले एकरूपता कायम गर्न यस्तो निर्णय गरिएको संघको भनाइ छ।
नयाँ निर्णयअनुसार अब कलैया बजार क्षेत्रमा छालासहित खसीको मासु प्रतिकिलो १,०५० रुपैयाँ र छाला हटाइएको मासु प्रतिकिलो १,१०० रुपैयाँमा बिक्री हुने छ। संघले यो मूल्य तत्कालदेखि नै लागू हुने स्पष्ट पारेको छ।
संघका पदाधिकारीहरूले निर्धारण गरिएको मूल्यलाई कडाइका साथ कार्यान्वयन गर्न सम्पूर्ण मासु व्यवसायीलाई निर्देशन दिएका छन्। साथै, उपभोक्तालाई पनि तोकिएको मूल्यभन्दा बढी नलिन आग्रह गर्दै यदि कसैले बढी मूल्य असुलेको पाइएमा सम्बन्धित निकायमा जानकारी गराउन अनुरोध गरिएको छ।
यस निर्णयले बजारमा मूल्य नियन्त्रणसँगै उपभोक्तालाई सहज र पारदर्शी सेवा उपलब्ध हुने अपेक्षा गरिएको छ। संघले भविष्यमा पनि बजारको अवस्थालाई मध्यनजर गर्दै आवश्यक परे मूल्य पुनरावलोकन गर्ने संकेत दिएको छ।
