जनकपुरधाम — बैशाख ७ ।रानी कुमारी ।मधेश प्रदेश सरकारका गृह, सञ्चार तथा कानुन मन्त्री फकिरा महतोले मधेश प्रदेश प्रहरी कार्यालय जनकपुरधामलाई २० थान सेलिङ्ग पंखा हस्तान्तरण गर्नुभएको छ। उक्त सामग्री मधेस प्रदेशको डि आईजी गोविन्द थापालियाललाई हस्तान्तरण गरिएको हो।
मधेश प्रदेश प्रहरी कार्यालयको नव निर्मित भवनमा आवश्यक भौतिक पूर्वाधार अझै पूर्णरूपमा व्यवस्थापन हुन नसक्दा कार्यसम्पादनमा समस्या देखिएको थियो। विशेषगरी कोठाहरूमा सेलिङ्ग पंखाको अभावका कारण कर्मचारीहरूले गर्मीका कारण असहज वातावरणमा काम गर्नुपरेको अवस्था थियो। सोही समस्यालाई ध्यानमा राख्दै मन्त्री महतोले तुरुन्तै सहयोग उपलब्ध गराउन पहल गर्नुभएको हो। हस्तान्तरण कार्यक्रममा बोल्दै मन्त्री महतोले सुरक्षाकर्मीहरूको कार्यक्षमता र मनोबल उच्च राख्न भौतिक सुविधा अपरिहार्य रहेको बताउनुभयो। “प्रहरी संगठन राज्यको महत्त्वपूर्ण अंग हो, वहाँहरूको कार्य वातावरण सहज बनाउन प्रदेश सरकार सधैं तत्पर छ,” उहाँले भन्नुभयो। साथै, आगामी दिनमा थप आवश्यक सामग्री उपलब्ध गराउने प्रतिबद्धता समेत व्यक्त गर्नुभयो।
डीआईजी थापालियाले मन्त्री महतोप्रति आभार व्यक्त गर्दै यस सहयोगले कार्यालयको दैनिक कामकाजमा सहजता ल्याउने विश्वास व्यक्त गर्नुभयो। उहाँले भन्नुभयो, “साना देखिने यस्ता आवश्यक सामग्रीले पनि काम गर्ने वातावरणमा ठूलो प्रभाव पार्दछ, जसले सेवा प्रवाहलाई प्रभावकारी बनाउँछ।”
स्थानीय तह र प्रदेश सरकारबीच समन्वय गर्दै सुरक्षा निकायको क्षमता अभिवृद्धि गर्ने कार्यमा मधेश प्रदेश सरकार सक्रिय देखिएको छ। पछिल्लो समय विभिन्न जिल्लामा प्रहरी कार्यालयहरूको स्तरोन्नति तथा आवश्यक सामग्री व्यवस्थापनमा प्रदेश सरकारले चासो दिँदै आएको छ।
यस सहयोगलाई स्थानीय स्तरमा सकारात्मक रूपमा लिइएको छ। सर्वसाधारणले पनि यस्ता कार्यले सरकारी निकायप्रतिको विश्वास बढ्ने अपेक्षा व्यक्त गरेका छन्। मन्त्री महतोको यो पहललाई जनउत्तरदायी र व्यवहारिक कदमका रूपमा हेरिएको छ।
