सर्लाही – २१ ।सर्लाही क्षेत्र नम्बर–४ मा मतदान सुरु भएसँगै मतदान केन्द्रमा केहीबेर तनाव उत्पन्न भएको छ।
बसबरिया गाउँपालिका–३ भवानीपुरस्थित जनता माध्यमिक विद्यालयमा रहेको मतदान केन्द्रमा मतदान सुरु भएको केही समयमै मतदाताबीच विवाद चर्किएको हो। सामान्य भनाभनबाट सुरु भएको विवाद बढ्दै जाँदा मतदान केन्द्रमा हुलदङ्गा भएको थियो।
स्थिति नियन्त्रण बाहिर जान थालेपछि खटिएका सुरक्षाकर्मीले तत्काल हस्तक्षेप गर्दै अवस्था नियन्त्रणमा लिएका थिए। विवादका कारण केहीबेर मतदान प्रक्रिया अवरुद्ध भएको थियो।
जिल्ला प्रशासनका अनुसार अहिले अवस्था पूर्ण रूपमा सामान्य भइसकेको छ र मतदान प्रक्रिया पुनः सुरु गरिएको छ। सम्भावित अप्रिय घटना रोक्न उक्त क्षेत्रमा सुरक्षा व्यवस्था थप कडा बनाइएको छ।
नेपाली कांग्रेसका सभापति गगन कुमार थापाको निर्वाचन क्षेत्र भएकाले पनि उक्त मतदान केन्द्रमा सुरक्षाकर्मीको निगरानी बढाइएको जनाइएको छ।
