एस पि सिंह
पुस २१ रौतहट
समाज सुधार्ने गलत कार्य रोक्ने नाबालक तथा महिलाको सुरक्षा गर्ने र सामाजिक परम्परा तथा मर्यादाको संरक्षण गर्ने प्रमुख दायित्व समाजका अगुवा तथा जनप्रतिनिधिको हुन्छ। तर दुःखको कुरा, यहाँ जनप्रतिनिधि स्वयंले आफ्नो जिम्मेवारी बिर्सेर समाजलाई गलत दिशातर्फ डोर्याउने भूमिका निर्वाह गरेको स्पष्ट देखिन्छ।
रौतहट जिल्लाको दुर्गा भगवती गाउँपालिका -४ छतौना गाउँमा सोही वडाका वडाअध्यक्ष रामानन्द प्रसाद यादवले १४ वर्षीया नाबालिक बालिकाको विषयमा अत्यन्तै गैरजिम्मेवार आपत्तिजनक र निन्दनीय भूमिका खेलेको आरोप गम्भीर रूपमा उठिरहेको छ। सो गाउँकै १७ वर्षका नाबालक युवक दिलीप यादवले उक्त नाबालिकालाई प्रेमको प्रभावमा पारेर घरबाट लगेको घटनापछि पीडित बालिकाका आमाबुबा तथा आफन्तहरूले समाजका अगुवा र वडाअध्यक्ष समक्ष छोरी जसरी भए पनि सुरक्षित रूपमा फिर्ता गरिदिन हारगुहार गर्दा समेत वडाअध्यक्षले पीडितको पक्षमा उभिनुको सट्टा उल्टै दोषी पक्षलाई संरक्षण र समर्थन गरेको गुनासो छ।
नाबालिक चेलीबेटीलाई प्रेमजालमा फसाई घरबाट भगाउने जस्तो गम्भीर अपराधमा संलग्न व्यक्तिलाई कानुनी दायरामा ल्याउनु पर्नेमा, वडाअध्यक्ष स्वयंले गलत बाटो सिकाउने, पीडित परिवारको इज्जतमा आँच पुर्याउने, तथा केटालाई आफ्नै परिवारमाथि झुटा दोष लगाउन दबाब दिने कार्य गरिरहेको आरोप अत्यन्तै गम्भीर र चिन्ताजनक छ।
जनताको विश्वासबाट निर्वाचित जनप्रतिनिधि भएर पनि बाल अधिकार, महिला सुरक्षा र कानुनी मर्यादाको खुलेआम उल्लंघन गर्दै दोषीलाई कारबाही गर्नुको सट्टा संरक्षण र साथ- सहयोग गर्नु न केवल गैरजिम्मेवार कार्य हो, यो समाजका लागि घातक उदाहरण पनि हो।
अमानवीय र समाजलाई दूषित बनाउने कार्य गर्ने व्यक्तिलाई कार्वाही गर्नुपर्छ । यस्ता व्यक्तिहरू समाजका लागि धमिरा सरह हुन्, जसले समाजको नैतिकता, सुरक्षा र भविष्यलाई भित्रैबाट क्षय गर्दै गलत दिशातर्फ लैजाने काम गरिरहेका हुन्छन्।
यस गम्भीर घटनाप्रति सम्बन्धित निकाय, सुरक्षा निकाय, बाल अधिकारकर्मी तथा सरोकारवाला सबैको गम्भीर ध्यानाकर्षण गराउँदै पीडित नाबालिकाको शीघ्र उद्धार, सुरक्षा र न्यायको सुनिश्चितता गर्न जोडदार माग गरेको हो।
