बारा ।मंसिर १०। श्रीकान्त गुप्ता – महागढीमाई नगरपालिका–२ मा अवस्थित श्री पालन पोषण बचत तथा ऋण सहकारी संस्थाले आफ्ना सेयर सदस्यको निधनपछि शोकाकुल परिवारलाई दाहसंस्कार सहयोग प्रदान गरेको छ । संस्थाले मृतक सेयर सदस्य अनिया लहेरिनको निधनपछि उहाँका परिवारलाई सेयरको २५ प्रतिशत बराबरको आर्थिक सहायता हस्तान्तरण गरेको हो।
महागढीमाई नगरपालिका–१ बस्ने अनिया लहेरिनको निधनपछि सहकारी संस्थाका अध्यक्ष नन्दकिशोर कुशवाहको नेतृत्वमा पुगेको टोलीले मृतकका छोरा गगनदेव साह लहेरालाई सो रकम हस्तान्तरण गरेको संस्थाका प्रबन्धक रंजित कुशवाहाले जनाएको छ । संस्थाले आफ्ना सदस्यप्रति देखाएको दायित्व, सहयोग र सामाजिक उत्तरदायित्वको उदाहरणका रूपमा यो सहयोगलाई लिएको छ।
सहकारी परिवारले लहेरिनको असामयिक निधनप्रति गहिरो शोक व्यक्त गर्दै दिवंगत आत्माको शान्तिको कामना गरेको छ । संस्थाले शोकग्रस्त परिवारलाई धैर्य र सहनशक्ति प्राप्त होस् भन्ने शुभकामनासमेत व्यक्त गरेको छ। सहकारीका पदाधिकारी तथा सदस्यहरूले स्वर्गीय लहेरिनको योगदान र सहकार्यलाई सम्झनासाथ श्रद्धान्जली अर्पण गरेका छन्।
श्री पालन पोषण बचत तथा ऋण सहकारी संस्था महागढीमाई क्षेत्रमा आर्थिक सशक्तीकरणका लागि सक्रिय रूपमा क्रियाशील छ। स्थानीय समुदायमा रोजगारी सिर्जना तथा आयमूलक व्यवसाय विस्तारका लागि ऋण प्रवाह गरेर सहकारीले उल्लेखनीय प्रभाव पार्दै आएको छ। बेरोजगार तथा सीपयुक्त व्यक्तिहरूलाई सहुलियतमा ऋण उपलब्ध गराई आत्मनिर्भरता बढाउन योगदान दिँदै आएको संस्थाप्रति स्थानीयवासीको विश्वास पनि बलियो बन्दै गएको छ।
सहकारीका पदाधिकारीका अनुसार संस्था केवल आर्थिक लेन–देनमा मात्र सीमित नभई सामाजिक उत्तरदायित्व वहन गर्ने उद्देश्यसहित समुदायमै उपयोगी कार्य गर्दै आएको छ। सदस्यको सुख–दुःखमा साथ दिनु, आपत्कालीन अवस्थाहरूमा सहयोग पुर्याउनु र सामाजिक सद्भाव वृद्धि गर्नु नै संस्थाको प्रमुख मूल्य रहेको संस्थाले जनाएको छ।
समाजको समृद्धि र साझा विकासका लागि सहकारीलाई मेरुदण्डका रूपमा चित्रण गर्दै संस्थाका प्रतिनिधिहरूले आगामी दिनमा पनि सदस्य हितका कार्यक्रमलाई निरन्तरता दिने प्रतिबद्धता व्यक्त गरेका छन्। सहकारीको सक्रियता र सामाजिक भूमिकाले महागढीमाई क्षेत्रका नागरिकलाई सहयोग र आशाको स्रोत बनेको स्थानीयको प्रतिक्रिया रहेको छ।
दाहसंस्कारको लागि आर्थिक सहयोग टोलीमा , संस्था उपाध्यक्ष जयचन्द्र जयसवाल ,कोषाध्यक्ष रामअयोध्या कुशवाहा ,सचिव बृजकिशोर साह लहेरा ,सदस्य रामकिशोर प्रसाद कुशवाहा,सदस्य संदिप कुशवाहा , लेख समिती संयोजक शिव प्रसाद गुप्ता, लेखा समिति सदस्य जितेन्द्र कुशवाहा , सेयर सदस्य पुरण साह कानु अन्य सदस्य पनि टोलिमा सहभागी रहेको थियो ।
