जनकपुर कार्तिक २४ । मधेस प्रदेशको राजनीतिक घटनाक्रममा सोमबार अप्रत्याशित मोड देखा परेको छ। प्रदेश प्रमुख सुमित्रा सुवेदी भण्डारीले नेकपा (एमाले) मधेस प्रदेश संसदीय दलका नेता सरोज कुमार यादवलाई सिन्धुलीस्थित एक होटेलमा गुपचुप रुपमा मुख्यमन्त्री पदको शपथ गराएकी छिन्।
संविधानको धारा १६८ (३) बमोजिम प्रदेशसभाको ठूलो दलका नेता भएकै हैसियतमा यादवलाई मुख्यमन्त्री नियुक्त गरिएको हो। जनकपुरमा शपथको वातावरण प्रतिकूल देखिएपछि शपथ स्थल सिन्धुली सारिएको भन्दै यादवले शपथपछि प्रतिक्रिया दिएका छन्। उनका अनुसार जनकपुरमा विरोध प्रदर्शन बढ्दै गएपछि वैकल्पिक स्थानमा शपथ गरिनु परेको हो।
यसअघि विश्वासको मत नपाउने अवस्था बनेपछि केही दिनअघि मात्र जितेन्द्र सोनलले मुख्यमन्त्री पदबाट राजीनामा दिएका थिए। तर, सोनलले शपथ प्रक्रिया र प्रदेश प्रमुखको भूमिकाप्रति असन्तुष्टि जनाएका छन्। उनले प्रदेश प्रमुख स्वास्थ्य उपचारका नाममा जनकपुर छाडेर काठमाडौँ जान लागेझैँ देखाए पनि बिचमै सिन्धुलीमा नै शपथ गराई प्रदेशको मर्यादामाथि प्रहार गरिएको आरोप लगाएका छन्।
सोनलले सामाजिक सञ्जालमा लेखेका छन्, “मधेस प्रदेशको जनतासँग धोका भयो। स्वास्थ्य उपचारको नाममा निस्केकी प्रदेश प्रमुखले सिन्धुली र महोत्तरीको सीमास्थित होटलमा प्रदेशको अस्मिता कमजोर पार्ने काम गरिन्।”
यस घटनापछि मधेस प्रदेशमा सत्ता समीकरण फेरबदलका बहस तीव्र बनेको छ। एकातिर एमालेले नयाँ नेतृत्व स्थापनाको दाबी बलियो बनाएको छ भने अर्कातिर सोनल नेतृत्वको गठबन्धन पक्षले शपथ प्रक्रियालाई ‘अनैतिक र अप्राकृतिक’ भन्दै प्रश्न उठाइरहेको छ। आगामी दिनमा विश्वासको मत प्रक्रियासँगै प्रदेश सभामा थप राजनीतिक तानातान देखिने संकेत मिलेको छ।
