काठमाडौं कार्तिक – २० । एनआर क्रेशनले नयाँ प्रेमिल गीत ‘तिम्रै हुँ म’ सार्वजनिक गरेको छ। गायक नरेश रेग्मीको स्वर रहेको यस गीतको म्यूजिक भिडियोमा चर्चित अभिनेत्री प्रेंका कार्की र स्वयं गायक रेग्मीले अभिनय गरेका छन्। गीत बजारमा आएलगत्तै चर्चा बटुल्न थालेको छ।
‘म सास बन्न पाए तिम्रो मुटुसम्म पुग्थे’ बोलको गीतले अपार सफलता हासिल गरेपछि रेग्मीले निरन्तर रुपमा हरेक वर्ष नयाँ र फरक स्वादका गीत प्रस्तुत गर्दै आएका छन्। हाल सार्वजनिक भएको ‘तिम्रै हुँ म’ रेग्मीको सोही निरन्तरताको अर्को कडीको रुपमा आएको बताइएको छ। गीतमा वामदेव रेग्मीको शब्द, प्रकाश रेग्मीको संगीत तथा मौसम हिमालको निर्देशन रहेको छ। भिडियोको छायांकन र सम्पादनमा पनि प्रविधिगत आधुनिकता र कलात्मक शैली अपनाइएको छ।
म्यूजिक भिडियोकी मुख्य पात्र प्रेंका कार्कीले गीतका दृश्य, कथा र प्रस्तुति आफुले अभिनय गरेको पूर्वका गीतभन्दा एकदमै फरक रहेको बताइन्। उनका अनुसार भिडियोमा समाहित भावनात्मक दृश्यहरू तथा चरित्र अभिव्यक्तिमा उनले विशेष मेहनत गरेकी छन्। “गीतको भाव र संगीत दुवै निकै गहिरो छन्। दर्शकले यसमा मेरो नयाँ रूप पाउनेछन्,” कार्कीले भनिन्।
यस्तै, गायक तथा मोडेल नरेश रेग्मीले ‘तिम्रै हुँ म’ ले नयाँ पुस्ताको मन मुटुमा बस्न सक्ने विश्वास व्यक्त गरे। “गीत प्रेममा रहेका युवायुवतीका मनको कथा हो। त्यसैले यो गीतले उनीहरूलाई आफूभित्रको भाव प्रस्तुत भएको अनुभूति गराउने रेग्मीले बताए।
सानै उमेरदेखि संगीतमा रुचि राख्दै आएका रेग्मी दुई दशकदेखि सांगीतिक यात्रामा सक्रिय छन्। दाङमा जन्मिएका उनी हाल अष्ट्रेलियामा बसोबास गर्दै आए पनि मातृभूमि र परिवेशसँग जोडिने विषयवस्तूलाई गीतमार्फत निरन्तरता दिँदै आएका छन्। उनले अहिलेसम्म दर्जनौं गीतमा स्वर दिँदै अधिकांश गीतका म्यूजिक भिडियोमा पनि अभिनय गरेका छन्।
रेग्मीले विदेशमा बसे पनि नेपाली संगीत क्षेत्रलाई निरन्तर योगदान दिइरहेको र उनका गीतले नयाँ पुस्ताको प्रेम, भावना र जीवनशैलीलाई प्रतिबिम्बित गर्ने बताइएको छ। ‘तिम्रै हुँ म’ गीत सामाजिक सञ्जाल तथा भिडियो स्ट्रिमिङ प्लेटफर्ममा अपलोड भएको केही समयमै दर्शक प्रतिक्रिया सकारात्मक पाइरहेको छ। समकालीन प्रेम कथालाई केन्द्रमा राखेर निर्माण भएको यस गीतले आगामी दिनमा अझै ठूलो दर्शक रोजाइ बटुल्ने अपेक्षा गरिएको छ।
