जनकपुरधाम । असोज २९ ।मधेस प्रदेशमा नयाँ सरकार गठनको प्रक्रिया तीव्र बन्दै गर्दा लोकतान्त्रिक समाजवादी पार्टी (लोसपा) नेपालका उपाध्यक्ष जितेन्द्र प्रसाद सोनलले मुख्यमन्त्रीका लागि दाबी पेस गरेका छन् । उनले नेकपा (माओवादी केन्द्र), जनमत पार्टी, जनता समाजवादी पार्टी (जसपा) नेपाल र नेकपा (एकीकृत समाजवादी)को समर्थनमा बुधबार प्रदेश प्रमुख सुमित्रा सुवेदी भण्डारीसमक्ष दाबी प्रस्तुत गरेका हुन् ।
प्रदेश प्रमुखले संविधानको धारा १६८(२) बमोजिम बहुमत प्राप्त दल वा दलहरूको समर्थनमा सरकार गठनका लागि आह्वान गरेपछि सोनलले पाँच दलीय गठबन्धनको तर्फबाट औपचारिक दाबी गरेका हुन् । गठबन्धनका नेताहरूले प्रदेशमा स्थायित्व, सुशासन र विकासका लागि सहकार्य गर्ने प्रतिबद्धता व्यक्त गरेका छन् ।
मधेस प्रदेशसभामा कुल १०७ सदस्य भए पनि हाल दुई जना निलम्बित रहेको अवस्थामा १०५ जना सदस्य कायम छन् । तीमध्ये एमालेका एक निलम्बितसहित २५, नेपाली कांग्रेसका २२, जसपाका १९, जनमत पार्टीका १३, माओवादी केन्द्रका ९, लोसपाका एक निलम्बितसहित ९, नेकपा (एकीकृत समाजवादी)का ७ र राप्रपा, नागरिक उन्मुक्ति पार्टी तथा संघीय समाजवादी पार्टीका १–१ जना सांसद रहेका छन् ।
सोनल नेतृत्वको गठबन्धनमा रहेका पाँच दलका जम्मा ५६ सांसदको समर्थन प्राप्त भएको बताइएको छ । यस गठबन्धनले मधेसमा लामो समयदेखि देखिँदै आएको राजनीतिक अस्थिरतालाई अन्त्य गर्दै सरकारलाई स्थायित्व दिने दाबी गरेको छ ।
गठबन्धनका नेताहरूले सोनलको नेतृत्वमा मधेसको पहिचान, स्वाभिमान, विकास र अधिकार सुनिश्चित हुने विश्वास व्यक्त गरेका छन् । अब प्रदेश प्रमुखले संविधानबमोजिम सोनललाई मुख्यमन्त्री नियुक्त गर्ने प्रक्रियालाई अघि बढाउने अपेक्षा गरिएको छ ।
राजनीतिक वृत्तमा सोनल नेतृत्वको यो गठबन्धनलाई मधेसमा नयाँ राजनीतिक समीकरणको रूपमा हेरिएको छ, जसले प्रदेशको आगामी राजनीतिक दिशानिर्देश तय गर्ने सम्भावना देखिएको छ ।
