जनकपुरधाम, असोज २९—मधेस प्रदेशमा सरकार गठनको नयाँ समीकरण बनेसँगै नेपाली कांग्रेसका मधेस प्रदेश प्रचार प्रमुख नितेश गुप्ताले जनमत पार्टीमाथि गम्भीर आरोप लगाएका छन् । उनले जनमत पार्टीले प्रारम्भिक सहमति विपरीत पैसाको प्रलोभनमा परेर लोसपासँग हात मिलाएको दाबी गरेका हुन् ।
गुप्ताले सामाजिक सञ्जालमार्फत प्रतिक्रिया दिँदै जनमत पार्टीले मधेसको जनताको विश्वास र भावना हत्या गरेको आरोप लगाए । “जनमत पार्टीले मधेसको हितका लागि होइन, व्यक्तिगत स्वार्थका लागि निर्णय गरेको छ । पैसा र पदको लोभमा परेर कांग्रेससँगको सहमति तोड्नु गद्दारी हो,” गुप्ताले भनेका छन् ।
उनका अनुसार कांग्रेसले मधेस प्रदेशमा स्थिर र विकासमुखी सरकार बनाउन जनमतसँग गहिरो छलफलपछि सहमति गरेको थियो । तर अन्तिम समयमा जनमतका केही शीर्ष नेताहरु लोसपाको प्रस्तावमा आकर्षित भएर सत्ता र सुविधाको लागि गठबन्धन परिवर्तन गरेको उनको आरोप छ ।
गुप्ताले जनमत पार्टीको यो कदमले मधेसको राजनीति फेरि अस्थिर दिशातर्फ लागेको बताएका छन् । “मधेसमा जनताले स्थायित्व खोजिरहेका छन्, तर नेताहरूको अवसरवादी सोचले प्रदेशको भविष्य नै जोखिममा पार्दैछ,” उनले भने ।
उता, जनमत पार्टीका नेताहरूले भने कांग्रेस प्रचार प्रमुखको आरोप अस्वीकार गर्दै गुप्ताको अभिव्यक्तिलाई निराधार र भडकाउपूर्ण भनेका छन् । उनीहरूले भने, “हामीले कुनै पैसाको प्रलोभनमा निर्णय गरेका होइनौँ । हाम्रो प्राथमिकता मधेसको हित र वास्तविक जनताको पक्षमा हुने सरकार हो ।”
मधेस प्रदेशमा हाल सरकार गठनको अन्तिम चरणमा दलहरूबीच कडा राजनीतिक रस्साकस चलिरहेको छ । प्रदेश प्रमुखले बहुमतको दाबी गर्न दलहरूलाई दिएको समयसीमा सकिँदै गर्दा सत्ता समीकरणमा भएको यो बदलाबले प्रदेशको राजनीतिक तापक्रम अझ बढाएको छ ।
राजनीतिक विश्लेषकहरूले यस घटनालाई मधेस प्रदेशको सत्ता संघर्षको निर्णायक मोडका रूपमा हेरिरहेका छन् । उनीहरूका अनुसार, दलहरूबीचको असहयोग र पदमुखी राजनीति दीर्घकालमा प्रदेशको स्थायित्वका लागि चुनौती बन्ने सम्भावना छ ।
