समाचार अभियान – श्रीकान्त गुप्ता
काठमाडौं,भदौ। २९ ।प्रधानमन्त्री सुशीला कार्कीले जेन–जी आन्दोलनका क्रममा देखिएको हत्या–हिंसा र सरकारी संरचनामाथि भएको क्षति सुनियोजित षड्यन्त्र भएको दाबी गरेकी छिन्। आइतबार पदभार ग्रहण गर्दै कर्मचारीहरूसँगको सम्बोधनमा उनले आन्दोलनका नाममा भौतिक तथा मानवीय सम्पत्तिमा भएको नोक्सानीलाई योजनाबद्ध आक्रमणको परिणाम भनेकी छन्।
प्रधानमन्त्री कार्कीले आफूलाई प्रधानमन्त्रीको जिम्मेवारी सडकबाट उठेका आवाजका आधारमा दिइएको स्मरण गर्दै भनिन्, “मैले यो पद आकस्मिक पाएको होइन। देशलाई संकटबाट निकाल्न जनताले आवाज उठाएपछि म जिम्मेवारीमा आएकी हुँ।”
उनले हिंसात्मक गतिविधिमा संलग्नलाई कडाभन्दा कडा कारबाही हुने चेतावनी दिँदै भनेकी छिन्, “यदि नेपालीहरूले नै हत्या–हिंसा गरेका हुन् भने उनीहरूलाई नेपाली भन्न मिल्दैन। अनुसन्धान गरेर नोक्सान गर्नेहरूलाई छोड्ने स्थिति रहने छैन।”
प्रधानमन्त्री कार्कीले विशेष गरी देशका अपरिहार्य भौतिक संरचना र सरकारी संस्थामाथि भएको आगजनी नियोजित रहेको दाबी गर्दै त्यसमा संलग्न समूह पहिचान गरिने स्पष्ट गरिन्। उनका अनुसार यस्तो कार्यमा संलग्न जो कोही भए पनि कानुनको दायरामा ल्याइनेछ।
युवाहरूको आन्दोलनका मागलाई सम्बोधन गर्ने प्रतिबद्धता दोहोर्याउँदै उनले आगामी दिनमा ठोस काम हुने उल्लेख गरिन्। “म युवाहरूले राखेका मागअनुसारै कदम चाल्छु। परिवर्तनको आवाजलाई बेवास्ता गर्ने अवस्था छैन,” उनले भनिन्।
साथै प्रधानमन्त्री कार्कीले आफ्नो कार्यकाल लामो नभएको जनाउँदै ६ महिनाभित्र सरकारले आवश्यक काम सम्पन्न गरेर नयाँ नेतृत्वलाई जिम्मेवारी हस्तान्तरण गर्ने दाबी गरिन्। उनले हालको प्राथमिकता मुलुकलाई शान्तिपूर्ण र स्थिर दिशामा लैजानु रहेको बताइन्।
उक्त सम्बोधनमार्फत प्रधानमन्त्री कार्कीले देशलाई हिंसाबाट जोगाउन जनतामाझ दृढ सन्देश दिएकी छिन्। आन्दोलनको नाममा हिंसा गर्नेहरूलाई कठोर जवाफ दिइने र लोकतान्त्रिक आन्दोलनलाई शान्तिपूर्ण ढंगले सम्बोधन गर्ने उनको प्रतिवद्धताले सरकारको आगामी कदमबारे उत्सुकता बढाएको छ।
