जनकपुरधाम, साउन ३० — जनकपुरमा पत्रकारमाथि भएको कुटपिट र दुर्व्यवहारको घटनामा संलग्न वकिलहरूलाई कारबाही गर्न माग गर्दै नेपाल पत्रकार महासंघ मधेस प्रदेश र धनुषा शाखाले प्रधानमन्त्री केपी शर्मा ओलीलाई संयुक्त ज्ञापनपत्र बुझाएका छन्।
साउन २७ गते नेपाल बार एशोसिएसन जनकपुरका केही वकिलहरूको समूहले जनकपुरमा पत्रकारहरूमाथि सामूहिक आक्रमण गरी कुटपिट गरेको घटनाले चर्को विरोध निम्त्याएको छ। उक्त घटनामा ६ जना पत्रकार घाइते भएका थिए।
घाइते पत्रकारहरूमा महासंघ मधेस प्रदेशका महासचिव शैलेन्द्र क्रान्तिको खुट्टा भाँचिएको, पत्रकार अनिल कुमार निरालाको आँखामा चोट लागेर सून्निएको, पत्रकार दिवाकर राईको टाउकोमा गम्भीर चोट लागेको विवरण उल्लेख गरिएको छ। साथै, उपाध्यक्ष ज्योति झा र पत्रकार बिनीता यादवमाथि लैङ्गिक संवेदनशीलता विपरीत व्यवहार गरिएको महासंघले आरोप लगाएको छ।
पत्रकार महासंघका अनुसार विवादको सुरुवात महासंघको भवन निर्माणका लागि गुठीसँग सम्झौतामा प्राप्त जग्गा नेपाल बार एशोसिएसन जनकपुरले बलपूर्वक अतिक्रमण गरी पार्किङ सञ्चालन गरेपछि भएको हो। सो जग्गा रक्षा गर्न पत्रकारहरूले घेरा हालेका बेला वकिलहरूको समूहले आक्रमण गरेको जनाइएको छ।
घटनापछि पीडित पत्रकारहरूले जिल्ला प्रहरी कार्यालय धनुषामा उजुरी दिएका भए पनि अहिलेसम्म दोषीहरूमाथि कुनै कानुनी कारबाही नहुनुमा महासंघले गम्भीर आपत्ति जनाएको छ। यही सन्दर्भमा प्रधानमन्त्रीको जनकपुरधाम आगमनको अवसरमा ज्ञापनपत्र बुझाइएको हो।
प्रधानमन्त्री ओली मधेस प्रदेश प्रहरी कार्यालयको नवनिर्मित भवन उद्घाटन कार्यक्रममा सहभागी हुन जनकपुरधाम आएका थिए। सोही अवसरमा महासंघका मधेस प्रदेश अध्यक्ष श्यामप्रसाद बन्जारा र धनुषा शाखा अध्यक्ष पुरन साहले संयुक्त रूपमा ज्ञापनपत्र बुझाएका थिए।
ज्ञापनपत्र प्राप्त गरेपछि प्रधानमन्त्री ओलीले पत्रकारमाथि आक्रमण गर्ने जो कोहीलाई पनि कानुनी दायरामा ल्याउन निर्देशन दिएको बताइएको छ। उनले अभिव्यक्ति स्वतन्त्रता र प्रेस स्वतन्त्रताको संरक्षणमा सरकार प्रतिबद्ध रहेको उल्लेख गरे।
महासंघले आक्रमणकारीलाई यथाशीघ्र कारबाही गरी पीडित पत्रकारहरूलाई न्याय दिलाउन प्रधानमन्त्रीबाट प्रभावकारी कदम चालिने अपेक्षा गरेको छ।
