बारा – साउन २७ – विशेष अदालतले कलैया उपमहानगरपालिकामा सेनिटरी प्याड खरिदमा भ्रष्टाचारको आरोप लागेका ६ जना कर्मचारी तथा व्यवसायीलाई सफाइ दिएको छ। तीन न्यायाधीशको संयुक्त इजलासले आरोप पुष्टि हुन नसकेको ठहर गर्दै उनीहरूलाई दोषमुक्त ठहर गरेको हो।
न्यायाधीश तेज नारायण सिंह राई, राम बहादुर थापा र विदुर कोइरालाको इजलासले मंगलबार सुनाएको फैसलामा उपलब्ध प्रमाणले आरोप पुष्टि गर्न नसकिएको जनाइएको छ। सफाइ पाउनेमा तत्कालीन प्रमुख प्रशासकीय अधिकृत स्वर्गीय प्रहलाद प्रसाद वर्णवाल, शिक्षाअधिकृत विजय अधिकारी, जिन्सी प्रमुख राजेश ठाकुर, लेखा अधिकृत दिव्या सर्राफ, सप्लायर्स सागर देवी फर्मा र सोही फर्माका प्रोप्राइटर विमलेश शाह रहेका छन्।
अख्तियार दुरुपयोग अनुसन्धान आयोगले २०८१ चैत २६ गते विशेष अदालतमा मुद्दा दायर गरेको थियो। आयोगले २०७७/७८ र २०७८/७९ आर्थिक वर्षमा सेनिटरी प्याड खरिद गर्दा सार्वजनिक खरिद ऐन नियमविपरीत प्रक्रियाबाट महँगो मूल्यमा ठेक्का दिइएको आरोप लगाएको थियो।
आयोगको दाबी अनुसार, पहिलो वर्ष प्रति प्याकेट ७८ रुपैयाँमा खरिद गरिएका प्याड दोस्रो वर्षमा २४ रुपैयाँमा खरिद गरिएको विवरण थियो। यसमा ९६ हजार २८० प्याकेट प्याड खरिद गर्दा ५१ लाख ९९ हजार १२० रुपैयाँ बढी भुक्तानी गरिएको दाबी गरिएको थियो। साथै, एउटै परिवारका फरक फर्ममार्फत बोलपत्र दिइ मिलेमतोमा ठेक्का लिएको आरोपसमेत थियो।
तर अदालतले प्रस्तुत प्रमाणहरू पर्याप्त नभएको ठहर गर्दै सबै प्रतिवादीहरूलाई सफाइ दिएको हो। मुद्दाका प्रमुख प्रतिवादी वर्णवालको २०८२ साउन ४ गते कलैया उपमहानगरको शिक्षा, युवा तथा खेलकुद महाशाखाको प्रमुखका रूपमा कार्यरत रहँदा असामयिक निधन भएको थियो।
अदालतको फैसलापछि बहुप्रतीक्षित यो मुद्दा टुंगिएको छ भने प्रतिवादीहरूले राहतको महसुस गरेका छन्।
