कलैया, साउन ५ । बाराको कलैया स्थित करण राज पार्टी प्यालेसमा आइतबार जनमत पार्टीले आयोजना गरेको बृहत पार्टी प्रवेश कार्यक्रम भव्यताका साथ सम्पन्न भएको छ। कार्यक्रममा बारा क्षेत्र नम्बर ३ का संविधानसभा सदस्य तथा जसपाका पूर्व नेताहरु प्रमोद प्रसाद गुप्ता र बारा क्षेत्र नं ३ (ख) का पूर्व प्रदेशसभा सदस्य पारस प्रसाद साहसहित विभिन्न राजनीतिक दल परित्याग गरेका सयौं नेता तथा कार्यकर्ताहरूले जनमत पार्टीकोमा प्रवेश गरेका छन ।
नवप्रवेशी नेताहरूलाई जनमत पार्टीका केन्द्रीय अध्यक्ष डा. सीके राउत र मधेस प्रदेशका मुख्यमन्त्री सतिस कुमार सिंहले फूलमाला र अबिर लगाएर पार्टीमा स्वागत गरे। प्रवेश कार्यक्रममा सहभागी नेताहरूले अब जनमत पार्टीलाई वैकल्पिक राजनीतिक शक्तिको रूपमा अघि बढाउन आफ्नो योगदान रहने बताए।
पूर्व संविधानसभा सदस्य गुप्ता र पूर्व प्रदेशसभा सदस्य साह दुवैजना जसपाबाट निर्वाचित भएका थिए। गुप्ता प्रतिनिधिसभामा तथा साह प्रदेशसभामा बाराको प्रतिनिधित्व गर्दै आएका थिए। उनीहरूद्वारा पार्टी परित्यागसँगै बारा क्षेत्र नं ३ मा जसपाको संगठन कमजोर बन्दै गएको राजनीतिक विश्लेषकहरू बताउँछन्।
कार्यक्रममा जनमत पार्टीका अन्य शीर्ष नेताहरूको पनि उपस्थिति रहेको थियो। वक्ताहरूले जनमत पार्टी जनताको भावना र परिवर्तनको आकांक्षासँग जोडिएको पार्टी भएकाले अब यो पार्टीलाई अझ बलियो र जनउत्तरदायी बनाउनुपर्नेमा जोड दिए।
पार्टी प्रवेश कार्यक्रममा सहभागिता जनाउने नेताहरूमा पूर्व वडाध्यक्ष, स्थानीय नेता तथा युवाहरूको उल्लेखनीय उपस्थिति रहेको थियो। सहभागीहरूले अब जनमत पार्टीको नीति, कार्यक्रम र विचारमा एकीकृत भएर आगामी निर्वाचनमा निर्णायक भूमिका खेल्ने प्रतिवद्धता जनाएका छन्।
यस कार्यक्रमसँगै बारामा जनमत पार्टीको प्रभाव बढेको छ भने जसपा कमजोर बन्दै गएको राजनीतिक संकेत देखिएको विश्लेषकहरूको भनाइ छ।
