बारा —असार २१ – श्रीकान्त गुप्ता – बारागढी गाउँपालिका–३ स्थित सभाहलमा शनिबार आयोजित एक विशेष समारोहबीच ‘सुनिश्चितता तथा दिगोपना घोषणा सभा’ सम्पन्न भएको छ। कार्यक्रमको उद्घाटन गाउँपालिका अध्यक्ष अशोक कुमार जयसवालले गर्नु भएको हो।
अध्यक्ष जयसवालले उद्घाटन मन्तव्यका क्रममा खोप कार्यक्रमलाई दिगो विकाससँग जोड्दै यसलाई स्थानीय सरकारको प्रमुख जिम्मेवारीका रूपमा अगाडि बढाइएको बताए। “सुनिश्चितता भनेको प्रत्येक नागरिकले आफ्नो मौलिक हकको उपयोग गर्न सक्ने अवस्था हो,” अध्यक्ष जयसवालले भने, “स्वास्थ्य, शिक्षा, सरसफाइजस्ता विषयमा पालिकाले निरन्तर कार्य गरिरहेको छ।स्थानीय स्वास्थ्य संस्थाका अनुसार बारागढी गाउँपालिकामा विगत केही वर्षयता नियमित र सफल खोप अभियान संचालन हुँदै आएको छ। नवजात शिशुदेखि वृद्ध नागरिकसम्मको स्वास्थ्य सुरक्षामा यो कार्यक्रम प्रभावकारी सावित भएको छ।यस घोषणासँगै बारागढी गाउँपालिकाले अब सबै नागरिकमा खोप पहुँच सुनिश्चित भइसकेको, नियमित खोप कार्यतालिका प्रभावकारी रूपमा लागू भएको र दिगो स्वास्थ्य सेवा प्रणाली स्थापना अध्यक्ष जयसवालले जनाइएको छ।
कार्यक्रममा प्रमुख प्रशासकीय अधिकृत सरोज चौधरीले खोप कार्यक्रमलाई पालिकाको ‘मेरुदण्ड’ को संज्ञा दिँदै यसले आर्थिक, सामाजिक तथा समग्र विकासमा टेवा पुर्याउने धारणा राख्नुभयो। “खोप कार्यक्रम केवल स्वास्थ्यसँग मात्र सम्बन्धित छैन, यो मानव विकासको आधार हो,” चौधरीले भन्नुभयो, “स्वास्थ्यकर्मीहरूले खेलेको भूमिका प्रशंसनीय छ, उनीहरूको समर्पणबिना यो सम्भव थिएन।
गाउँपालिकाले आगामी दिनमा पनि सामुदायिक सहभागिता र अन्तरसंस्थागत सहकार्यमा आधारित रही स्वास्थ्य, शिक्षा र सामाजिक सेवामा दिगोपनाका कार्यक्रम अघि बढाउने योजना बनाएको जनाएको छ।
कार्यक्रम सभामा विभिन्न वडाध्यक्ष, जनप्रतिनिधि, स्वास्थ्यकर्मी, महिला समूह, युवा क्लबका प्रतिनिधि र सर्वसाधारणको उल्लेख्य उपस्थिति रहेको थियो। कार्यक्रममा खोप अभियानमा योगदान दिने स्वास्थ्यकर्मी र समुदायका अगुवाहरूलाई सम्मान गरिएको थियो।
