जनकपुरधाम, वैशाख १७ –श्रीकान्त गुप्ता – मधेस प्रदेश सरकारअन्तर्गत खेलकुद तथा समाज कल्याण मन्त्रालयका मन्त्री प्रमोद जसवालको सक्रिय कार्यशैलीले मधेसमा सकारात्मक चर्चा बढिरहेको छ। विकासको नाममा कहिल्यै पनि प्राथमिकता नपाएको खेलकुद र समाज कल्याण क्षेत्र अब जनस्तरमै छलफलको विषय बन्न थालेको छ। मन्त्री जसवालाको योजनाबद्ध दृष्टिकोण, नियमित स्थलगत निरीक्षण, र जनसमुदायसँग प्रत्यक्ष संवादले उनलाई लोकप्रिय नेताको रुपमा स्थापित गराउँदैछ।
मधेसका जिल्लाहरू—पर्सा, बारा, रौतहट, सर्लाही, महोत्तरी, धनुषा, सिराहा र सप्तरीमा मन्त्री जसवालाले विभिन्न कार्यक्रमहरू सञ्चालन गर्दै खेलकुदको पूर्वाधार विकास र सामाजिक संरक्षणलाई प्राथमिकतामा राखेका छन्। खेल मैदान निर्माण, प्रशिक्षण केन्द्र स्थापना, अपाङ्गता भएका व्यक्तिहरूका लागि सहुलियत कार्यक्रम र वृद्धवृद्धालाई लक्षित सेवाहरूको विस्तार जस्ता योजनाहरूले आमनागरिकको ध्यान खिचेको छ।
मन्त्री जसवालाले जनकपुरधाममा खेलकुद तथा समाज कल्याण मन्त्रालयमा समाचार अभियानका अध्यक्ष तथा प्राईम टेलिभिजनका पत्रकार श्रीकान्त गुप्तासंग कुराकानी गर्दै खेलाडीहरूको प्रतिभा उजागर गर्न प्रदेश सरकारले ठोस पहल गरिरहेको बताएका थिए। उनले भने, “खेलकुद केवल मनोरञ्जन होइन, यो स्वास्थ्य, अनुशासन र समृद्धिको मूल आधार हो। हामी मधेसका युवाहरूलाई अन्तर्राष्ट्रिय स्तरमा पुर्याउने लक्ष्यमा अघि बढिरहेका छौँ।”
वृद्ध, अपाङ्ग, एकल महिला र विपन्न वर्गका लागि विभिन्न कार्यक्रम ल्याइएको कारणले जनतामा सरकारप्रतिको भरोसा बढाएको छ।
मन्त्री जसवालाले सामाजिक संस्थाहरूसँग समन्वय गर्दै युवाहरूमा नशा विरुद्धको जनचेतना अभियान, बाल विवाह अन्त्य अभियान र लैङ्गिक हिंसाविरुद्ध कार्यक्रमहरू पनि सञ्चालन गरिरहेका छन्। यसले उनी केवल विकासे मन्त्री नभई सामाजिक अभियन्ता पनि हुन् भन्ने सन्देश दिएको छ।
स्थानीयस्तरमा भएका छलफल र सर्वेक्षणहरूले पनि देखाउँछ कि मन्त्री जसवालाको कार्यशैली जनमुखी र परिणाममुखी छ। “हामीले पहिले यस्तो सक्रियता देखेका थिएनौं,” बाराकी सामाजिक अभियन्ता सीमा साहले भन्छिन्, “अब जनताले महसुस गर्न थालेका छन् कि सरकार उनीहरूकै सेवामा छ।”
मधेसमा मन्त्री प्रमोद जसवालाको यो जनमुखी कार्यशैलीले निश्चय नै प्रदेश सरकारप्रति जनआस्था बढाएको छ। उनको योजनाबद्ध, दूरदर्शी र पारदर्शी नेतृत्वले मधेसलाई सामाजिक र खेलकुद विकासको नयाँ उचाइमा पुर्याउने अपेक्षा गरिएको छ।
