पर्सा — चैत ३० ।पर्साको वीरगञ्जमा शनिबार हनुमान जयन्तीको अवसरमा आयोजित शोभा यात्राका क्रममा छपकैया इदगाह चोकमा दुई समुदायबीच झडप हुँदा एक दर्जनभन्दा बढी प्रहरी र स्थानीय घाइते भएका छन्। स्थिति तनावपूर्ण भएपछि स्थानीय प्रशासनले कर्फ्यु आदेश जारी गरेको छ।
शनिबार साँझ भएको झडपमा जिल्ला प्रहरी कार्यालय बाराका प्रहरी निरीक्षक बाबुराम पुडासैनीसहित करिब डेढ दर्जन मानिस घाइते भएका छन्। उनीहरूको वीरगञ्जस्थित नारायणी अस्पतालमा उपचार भइरहेको जिल्ला प्रहरी कार्यालय पर्साले जनाएको छ।
स्थानीय प्रत्यक्षदर्शीका अनुसार शोभा यात्रा छपकैया इदगाह चोक नजिक पुग्दा एक समुदायका व्यक्तिले छतबाट ढुंगा प्रहार गरेको आरोप यात्रामा सहभागीहरूले लगाएका छन्। “शान्तिपूर्ण रूपमा गीत–सङ्गीतसहित अघि बढिरहेको यात्रालाई एकाएक ढुंगामुढा गरेपछि स्थिति बिग्रियो,” एक सहभागीले बताएका छन्।
ढुंगामुढापछि आक्रोशित भीडले इदगाह चोकमा रहेका दुईवटा होटेलमा तोडफोड गर्नुका साथै करिब आधा दर्जन मोटरसाइकलमा आगजनीसमेत गरेका थिए। झडप नियन्त्रणमा लिन सुरक्षाकर्मीहरू परिचालन गरिए पनि स्थिति थप जटिल बनेपछि प्रशासनले कर्फ्यु लगाएको हो।
पर्साका प्रमुख जिल्ला अधिकारी गणेश अर्यालले स्थानीय प्रशासन ऐन, २०२८ को दफा ६(क) अनुसार शनिबार साँझ ६:३० बजेदेखि आइतबार मध्यान्ह १२ बजेसम्म लागू हुने गरी कर्फ्यु आदेश जारी गरेका छन्।
कर्फ्यु क्षेत्रको चार किल्ला तोकिएको छ — पूर्वमा भेडियाही चोक (वीरगञ्ज-१५), पश्चिममा सिर्सिया पुल (वीरगञ्ज-२५), उत्तरमा गण्डक चोक (वीरगञ्ज-१४) र दक्षिणमा शङ्कराचार्य गेट (वीरगञ्ज-१६) सम्मका क्षेत्र कर्फ्यु अन्तर्गत छन्।
कर्फ्यु अवधिमा सो क्षेत्रमा कुनै पनि प्रकारको आवतजावत, सभा, जुलुस, प्रदर्शन वा भेला गर्न निषेध गरिएको छ। प्रशासनले शान्ति-सुरक्षा कायम गर्नका लागि कर्फ्यु आदेश आवश्यक भएको जनाएको छ। स्थिति नियन्त्रणमा ल्याउन प्रहरी र सशस्त्र प्रहरी बलका थप टोलीहरू खटाइएको छ।
