बारा – चैत ९ सिकेन्द्र साह रौतहट जिल्लाको फतुवा बिजयपुर नगरपालिका–३, मेवा टोलमा शनिबार अपराह्न १२ बजे दुई किशोरी एकै रुखमा पासो लागेको अवस्थामा फेला परेका छन्।
स्थानीय वडाध्यक्ष रामेश्वर यादव तथा गाउँलेहरूले घटना बारे जानकारी दिएपछि विजयपुर इलाका प्रहरी कार्यालयका प्रहरी निरीक्षक इन्द्र मणि अधिकारी नेतृत्वको टोली घटनास्थलमा पुगेको थियो। मृतकहरू सोही टोलका सुरेश पण्डितकी १७ वर्षीया छोरी पूजा कुमारी पण्डित र इन्दल पासवानकी १६ वर्षीया छोरी कल्पना कुमारी पासवान रहेको खुलेको छ।
प्रारम्भिक अनुसन्धानअनुसार दुबै जना घरबाट खाना खाएर खेततर्फ घुम्न निस्किएका थिए। केही समयपछि उनीहरूलाई एकै रुखमा पासो लागेको अवस्थामा भेटिएपछि गाउँ शोकमा डुबेको छ। घटनाको कारणबारे अनुसन्धान भइरहेको प्रहरी निरीक्षक अधिकारीले जानकारी दिएका छन्। दुबै किशोरीको शव पोस्टमार्टमका लागि गौरस्थित प्रादेशिक अस्पताल पठाइएको छ।
