मोतिहारी – माघ १६ ।भारतको उत्तर प्रदेशस्थित प्रयागराजमा जारी कुम्भमेलाका क्रममा गएराति भागदौड मच्चिँदा ठूलो संख्यामा हताहत भएको आशङ्का गरिएको छ।
स्थानीय प्रत्यक्षदर्शीका अनुसार बुधबार बिहान करिब १ः३० बजे मौनी अमावस्याका अवसरमा अमृतस्नानका लागि जुटेको भीड नियन्त्रणबाहिर जाँदा भागदौड भएको हो। भीडले सुरक्षाका लागि राखिएका बार तथा अवरोधहरू तोडेर अघि बढ्ने क्रममा एक आपसमा ठेलमठेल भएपछि त्रासदी भएको बताइएको छ।
एक स्थानीय चिकित्सकले नाम उल्लेख नगर्ने सर्तमा समाचार संस्था एएफपीलाई दिएको जानकारीअनुसार घटनामा कम्तीमा १७ जनाको ज्यान गएको छ भने कैयौँ व्यक्ति घाइते भएका छन्। तर, प्रशासनले अहिलेसम्म औपचारिक रूपमा मृत्युको पुष्टि गरेको छैन।
प्रयागराजमा भइरहेको कुम्भमेला विश्वकै सबैभन्दा ठूलो धार्मिक जमघटहरूमध्ये एक मानिन्छ, जसमा लाखौँ श्रद्धालु गङ्गा नदीमा पवित्र स्नान गर्न पुग्छन्। यो वर्षको अमृतस्नानका लागि विशेष रूपमा ठूलो भिड जम्मा भएको थियो, जसका कारण व्यवस्थापनमा कठिनाइ भएको देखिएको छ।
हाल घटनास्थलमा उद्धार तथा राहत कार्य जारी रहेको र घाइतेहरूको उपचारका लागि विभिन्न अस्पतालहरूमा पठाइएको प्रशासनले जनाएको छ।
।
