वीरगञ्ज, असार २९– पिउने पानीको बोतलमा बिक्री मूल्य (एमआरपी) उल्लेख नगरिँदा पर्साको वीरगञ्ज क्षेत्रमा उपभोक्ताहरू ठगिने गरेको गुनासो बढ्दै गएको छ। पानी कम्पनीले उत्पादन गरिएका चान्स पानीको बोतलहरूमा बिक्री मूल्य र उत्पादन मिति नलेखिएको पाइएपछि पसलेहरूले मनपरी रूपमा मूल्य निर्धारण गरी बिक्री गर्ने गरेको उपभोक्ताहरूले बताएका छन्।
उपभोक्ताहरूका अनुसार एउटै कम्पनीको एउटै आकारको पानीको बोतल कतै २० रुपैयाँमा बिक्री भइरहेको छ भने कतै २५ रुपैयाँसम्म असुल्ने गरिएको छ। बोतलमा मूल्य स्पष्ट रूपमा उल्लेख नभएकाले ग्राहकहरूले वास्तविक मूल्यबारे जानकारी नपाउँदा अतिरिक्त रकम तिर्न बाध्य हुने अवस्था सिर्जना भएको छ।
विशेषगरी वीरगञ्जको व्यस्त क्षेत्र घण्टाघरस्थित टेम्पु स्टेशन आसपासका पसलहरूमा यस्तो समस्या बढी देखिएको स्थानीयले बताएका छन्। दैनिक सयौं यात्रु ओहोरदोहोर गर्ने उक्त क्षेत्रमा यात्रुहरूलाई लक्षित गरी पानी, चिसोपेय तथा अन्य उपभोग्य वस्तुहरू बिक्री हुने गरेकाले मूल्य नलेखिएका सामानमा बढी शुल्क असुल्ने प्रवृत्ति बढेको गुनासो आएको हो।
यात्रुहरूले तत्काल आवश्यकताका कारण पानी खरिद गर्ने भए पनि मूल्यबारे प्रश्न उठाउँदा पसलेहरूले फरक–फरक जवाफ दिने गरेका छन्। कतिपय अवस्थामा उपभोक्ताले बिलसमेत नपाउने गरेको बताइएको छ। यसले उपभोक्ता अधिकारको समेत उल्लंघन भएको सरोकारवालाहरूको भनाइ छ।
उपभोक्ता अधिकारकर्मीहरूले उत्पादन गर्ने कम्पनीले प्रत्येक बोतलमा अनिवार्य रूपमा अधिकतम खुद्रा मूल्य स्पष्ट रूपमा उल्लेख गर्नुपर्ने बताएका छन्। मूल्य उल्लेख नगरी बजारमा सामान पठाउनु कम्पनीको कमजोरी भएको उनीहरूको भनाइ छ। साथै खुद्रा विक्रेताले पनि मूल्य नदेखिएको बहानामा मनोमानी दरमा बिक्री गर्न नपाउने कानुनी व्यवस्था रहेको उनीहरूले स्मरण गराएका छन्।
स्थानीय उपभोक्ताहरूले बजार अनुगमन गर्ने निकाय, वाणिज्य तथा आपूर्ति कार्यालय, जिल्ला प्रशासन कार्यालय तथा सम्बन्धित स्थानीय तहलाई तत्काल अनुगमन गर्न आग्रह गरेका छन्। मूल्य नलेखिएका उत्पादन बजारबाट हटाउने, कम्पनीलाई स्पष्टीकरण सोध्ने तथा बढी मूल्य लिने पसलेमाथि कारबाही गर्नुपर्ने मागसमेत उठेको छ।
उपभोक्ता हित संरक्षण तथा निष्पक्ष व्यापार सुनिश्चित गर्न उत्पादनदेखि बिक्रीसम्मको प्रक्रियामा कडाइ आवश्यक रहेको सरोकारवालाहरूले बताएका छन्। बजारमा मूल्य पारदर्शिता कायम नभएसम्म उपभोक्ता ठगिने क्रम रोक्न कठिन हुने उनीहरूको भनाइ छ।
