बारा पुस १। मधेस प्रदेश सरकारका पूर्व मुख्यमन्त्री माननीय जितेन्द्र सोनलले प्रसौनी बजारदेखि नकटुवा नहर हुँदै इटियाही–विश्रामपुर गाउँपालिका कार्यालय (मुसहर्वा–बलिरामपुर) जोड्ने करिब ५ किलोमिटर सडक निर्माण कार्यको शिलान्यास गरेका छन्।
सोमबार आयोजित शिलान्यास कार्यक्रममा पूर्व मुख्यमन्त्री सोनलले लामो समयदेखि स्थानीयवासीले भोग्दै आएको आवागमनको समस्यालाई समाधान गर्न यो सडक महत्वपूर्ण हुने बताए। उनले ग्रामीण क्षेत्रको विकास बिना समग्र प्रदेशको विकास सम्भव नहुने उल्लेख गर्दै आधारभूत पूर्वाधार निर्माणलाई प्राथमिकतामा राखेर काम भइरहेको बताए।
सोनलका अनुसार सडक निर्माण भएपछि प्रसौनी, मुसहर्वा, बलिरामपुर तथा आसपासका बस्तीका बासिन्दालाई बजार, स्वास्थ्य सेवा, शिक्षा र स्थानीय सरकारको कार्यालयसम्म पुग्न सहज हुनेछ। वर्षायाममा हिलाम्मे र हिउँदमा धुलाम्मे हुने यस क्षेत्रको सडक अवस्था सुधार भई यातायात सुरक्षित र सहज बन्ने विश्वास व्यक्त गरे।
कार्यक्रममा जनप्रतिनिधि, राजनीतिक दलका नेता, स्थानीय बुद्धिजीवी तथा सर्वसाधारणको उल्लेख्य उपस्थिति रहेको थियो। इटियाही–विश्रामपुर गाउँपालिकाका जनप्रतिनिधिहरूले सडक निर्माणले स्थानीय आर्थिक गतिविधि बढ्ने, कृषि उपज बजारसम्म छिटो पुग्ने र विकासका नयाँ सम्भावना खुल्ने बताएका छन्।
स्थानीयवासीहरूले पटक–पटकको मागपछि सडक निर्माणको काम सुरु हुन लागेकोमा खुशी व्यक्त गरेका छन्। उनीहरूका अनुसार सडक बनेपछि आपतकालीन सेवामा समेत सहजता आउनेछ।
सम्बन्धित निकायका अनुसार तोकिएको मापदण्ड अनुसार गुणस्तरीय निर्माण गरी निर्धारित समयमै सडक सम्पन्न गर्ने लक्ष्य लिइएको छ। सडक निर्माण पूरा भएपछि प्रसौनीदेखि इटियाही–विश्रामपुरसम्मको यात्रा समय घट्ने र समग्र क्षेत्रमा विकासको गति तीव्र हुने अपेक्षा गरिएको छ।
