काठमाडौँ । मंसिर २३ ।चर्चित गायिका रीता केसी यस वर्षको ‘नारायणगोपाल युवा संगीत पुरस्कार–२०८२’ बाट सम्मानित भएकी छन्। राष्ट्रिय युवा सेवा कोषले प्रदान गर्ने यस प्रतिष्ठित सम्मानसँगै उनले ४० हजार रुपैयाँ नगद पुरस्कार प्राप्त गरेकी हुन्। कोषका सदस्य–सचिव डा. विष्णुबहादुर भण्डारीले मूल्यांकन समितिको अध्यक्षता वरिष्ठ संगीतकार प्रा. डा. दीपक जंगमले गरेको जानकारी दिंदै समितिले एकमतका साथ गायिका केसीलाई सिफारिस गरेको बताए।
करीब दुई दशकदेखि नेपाली गायन क्षेत्रमा सक्रिय केसी पछिल्ला वर्षहरूमा निरन्तरता, सङ्घर्ष र उत्कृष्ट प्रस्तुतिका कारण चर्चामा रहँदै आएकी छन्। दाङ घर भई राजधानीलाई कर्मथलो बनाएकी उनी आधुनिक तथा गजल गीतका माध्यमबाट सुगम संगीत क्षेत्रमा विशिष्ट पहिचान बनाउन सफल मानिन्छिन्। हाल संगीत विषयमै विद्यावारिधि (PhD) गर्दै आएकी केसी अध्ययन र सिर्जनशीलता दुबै क्षेत्रमा उत्तिकै सक्रिय छिन्।
पुरस्कार प्राप्त गरेपछि गायिका केसीले यो सम्मान आफूका लागि ठूलो प्रेरणा बनेको बताइन्। “यस वर्षको छनोटमा परेकी रहेछु, धेरै खुशी छु र आफैलाई भाग्यमानी ठान्छु,” भन्दै उनले सांगीतिक यात्रालाई अझै ऊर्जा मिलेको धारणा राखिन्। उनका अनुसार पुरस्कारले कलाकारलाई सिर्जनामा निरन्तर योगदान दिन उत्साहित बनाउने उल्लेख गरेकी छन्।
पुरस्कार काठमाडौंमा आयोजित विशेष समारोहका बीच प्रदान गरिएको हो। कार्यक्रममा सांगीतिक क्षेत्रका कलाकार, विद्वान, सञ्चारकर्मी तथा अन्य व्यक्तित्वहरूको उपस्थिति थियो। कार्यक्रममा वक्ताहरूले गायिका केसीले नेपाली संगीतलाई दिएका योगदानको प्रशंसा गर्दै आगामी दिनमा पनि उनको सिर्जनात्मक यात्रा अझ समृद्ध हुने विश्वास व्यक्त गरे।
नारायणगोपाल युवा संगीत पुरस्कार नेपाली संगीत क्षेत्रमा युवा कलाकारहरूको योगदान र क्षमताको कदर गर्दै प्रत्येक वर्ष प्रदान गरिने प्रतिष्ठित सम्मानका रूपमा स्थापित छ। यस वर्षको संस्करणमा गायिका रीता केसी सम्मानित भएपछि संगीतकर्मी तथा शुभेच्छुकहरूबाट शुभकामनाको ओइरो परेको छ।
