बारा – मंसिर ४ ।श्रीकान्त गुप्ता – बाराको सिमरा क्षेत्र बिहीबार दिनभर तनावपूर्ण बने पनि अन्ततः जेन–जी युवासमूहले निर्धारित विरोध कार्यक्रम स्थगित गरेको छ। कुटपिट प्रकरणमा संलग्न व्यक्तिहरूलाई पक्राउ गर्ने प्रशासनको आश्वासन र शुक्रबार औपचारिक वार्ता गर्ने सहमतिसँगै उनीहरूले प्रदर्शन रोक्ने निर्णय गरेका हुन्।
जेन–जी युवा अभियन्ता कपिल खरेलका अनुसार बिहानदेखि जारी आन्दोलनको दोस्रो दिन प्रशासनसँग संवाद भएपछि स्थिति शान्त बन्दै गएको हो। “कुटपिटका दोषीलाई कारबाही गर्ने प्रतिबद्धता आएपछि शुक्रबार वार्ता बस्ने सहमति भयो,” उनले बताए। जेन–जी युवाले आफूहरूमाथि भएको कुटपिटबारे छानबिन र दोषीमाथि कडा कदम चाल्न माग राख्दै विरोध गर्दै आएका छन्।
बिहीबार पनि जेन–जी समूहले राजमार्ग अवरुद्ध गर्दै प्रदर्शन गरेका थिए। प्रदर्शन चर्किँदा प्रहरी र प्रदर्शनकारीबीच झडप भएको थियो। झडपमा ६ जना प्रहरी र ४ जना जेन–जी समर्थक घाइते भएको जिल्ला प्रशासन स्रोतले जनाएको छ। घाइतेहरूमध्ये कसैको पनि अवस्था गम्भीर नभएको बताइएको छ।
झडपपछि केही समय राजमार्ग पूर्णरूपमा अबरुद्ध बनेको थियो। अवरुद्ध सडकका कारण सिमरा–कोहलवी–काठमाडौं र सिमरा–वीरगञ्जतर्फका सवारीसाधन ठप्प भएका थिए। यात्रुहरू घण्टौँ सडकमै अल्झनु परेको अवस्था सिर्जना भएको थियो।
तर, आन्दोलन रोक्ने निर्णयसँगै सिमराको वातावरण क्रमशः सामान्य बन्दै गएको छ। बिहान ११ बजेदेखि रोकिएको यातायात सुचारु भएपछि सवारी आवागमन पुरानै गतिमा फर्किएको स्थानीयले बताएका छन्। बजार, पसल, व्यवसाय र कार्यालयहरू पनि बिस्तारै सञ्चालनमा फर्किन थालेका छन्।
प्रशासन र जेन–जीबीचको शुक्रबार हुने वार्ताले कुटपिट प्रकरणको समाधान गर्ने अपेक्षा गरिएको छ। स्थानीयवासीले दुवै पक्षलाई शान्ति–सुरक्षाको वातावरण कायम राख्दै समस्याको स्थायी समाधानतर्फ ध्यान दिन आग्रह गरेका छन्।
