काठमाडौं — कार्तिक २९ ।नेपालमा द्रुत सहरीकरणसँगै आवास, पूर्वाधार र योजनाबद्ध सहरी विकासलाई सुदृढ बनाउने उद्देश्यले जग्गा तथा आवास विकास संघको प्रथम अधिवेशन तथा प्रदेश स्तरीय भेला सुनसरीमा सम्पन्न भएको छ। पहिलोपटक प्रदेशस्तरमा आयोजित यस भेलामा सरकारी, निजी क्षेत्रका प्रतिनिधि, जग्गा–आवास व्यवसायी तथा स्थानीय सरोकारवालाको उल्लेखनीय सहभागिता रहेको थियो।
कार्यक्रममा नेपाल अर्बान इन्फ्रास्ट्रक्चर डेभलपमेन्ट कम्पनीले नेपालको सहरी विकासको वर्तमान अवस्थामाथि विश्लेषण प्रस्तुत गर्दै ग्रीन सिटी, स्मार्ट सिटी, डिजिटल सिटी र मेगा सिटी जस्ता अवधारणालाई व्यवहारिक रूपमा विस्तार गर्दै लैजाने दीर्घकालीन लक्ष्य सार्वजनिक गरेको छ। कम्पनीका प्रतिनिधिहरूले द्रुत सहरीकरणको चुनौती समाधानका लागि वातावरणमैत्री, प्रविधिमैत्री र योजनाबद्ध विकासलाई मुख्य प्राथमिकता दिनुपर्नेमा जोड दिए।
भेलामा नेपाल जग्गा तथा आवास विकास महासंघका अध्यक्ष विष्णु प्रसाद घिमिरेले जग्गा कारोबार र आवास क्षेत्रमा देखा परेका कानुनी, प्रशासनिक तथा प्राविधिक समस्यालाई सम्बोधन गर्न सम्बन्धित निकायबीच प्रभावकारी सहकार्य आवश्यक रहेको बताए। उनले अनियोजित शहरीकरणले देशको दीर्घकालीन विकासमा बाधा पुर्याइरहेको उल्लेख गर्दै नीतिगत सुधार तथा कडाइका साथ कार्यान्वयन हुनुपर्नेमा ध्यानाकर्षण गराए।
कार्यक्रममा सहभागी सरोकारवालाहरूले नेपालमा सहरी रूपान्तरणलाई गति दिन नवीन सोच, आधुनिक प्रविधि र सार्वजनिक–निजी सहकार्यको महत्वपूर्ण भूमिका रहने टिप्पणी गरे। उनीहरूले सुरक्षित, व्यवस्थित र योजनाबद्ध सहरी आवास प्रणाली निर्माणका लागि संघले चलाइरहेको सक्रियताप्रति सकारात्मक प्रतिक्रिया व्यक्त गर्दै आगामी दिनमा अझ परिणाममुखी कार्यक्रम सञ्चालन गर्न सुझाव दिएका थिए।
अधिवेशन समापन कार्यक्रममा संघका पदाधिकारीहरूले नियमित प्रदेशस्तरीय समन्वय, नीतिगत सुझाव, सहरी विकाससम्बन्धी जनचेतना कार्यक्रम तथा आवश्यक पूर्वाधार विकासका लागि संस्थागत साझेदारी विस्तार गर्ने प्रतिबद्धता व्यक्त गरे। संघले छिट्टै निर्वाचन मार्फत नयाँ कार्य समिति चयन गरी प्रदेश तथा राष्ट्रिय स्तरमा सहरी विकासका अभियानलाई तीव्रता दिने जनाएको छ।
