जनकपुरधाम, २९ असोज ।मधेश प्रदेशमा नयाँ मुख्यमन्त्रीको नियुक्ति विवादास्पद बनेको छ । नेपाली कांग्रेसका नेता–कार्यकर्ताहरूले प्रदेश प्रमुख सुमित्रा सुवेदी भण्डारीले लोसपा नेता जितेन्द्र प्रसाद सोनललाई मुख्यमन्त्रीमा गरेको नियुक्ति असंवैधानिक रहेको भन्दै बुधबार प्रदेश प्रमुख कार्यालय अगाडि नाराबाजी गरेका छन् ।
प्रदर्शनकारीहरूले सोनलको नियुक्ति बदर गर्न माग गर्दै प्रदेश प्रमुखको निर्णय संविधानविपरीत भएको आरोप लगाएका छन् । उनीहरूका अनुसार जनमत पार्टी फुटिसकेको र जनमतका केही सांसदहरूले जनस्वराज पार्टीमा सनाखत गरिसकेको अवस्थामा लोसपाका तर्फबाट मुख्यमन्त्री नियुक्त गर्नु असंवैधानिक कदम हो ।
यसअघि कांग्रेस संसदीय दलका नेता कृष्णप्रसाद यादवले जनमतका १३ सांसदको समर्थनसहित ५८ सांसद आफ्नो पक्षमा रहेको दाबी गर्दै मुख्यमन्त्रीको दाबी प्रदेश प्रमुखसमक्ष पेस गरेका थिए । तर केही बेरपछि प्रदेश प्रमुख भण्डारीले लोसपा नेता सोनललाई संविधानको धारा १६८(२) बमोजिम मुख्यमन्त्रीमा नियुक्त गरेकी थिइन् ।
कांग्रेसले यो निर्णय जनमतको विभाजित अवस्थालाई बेवास्ता गरी गरिएको भन्दै कडा आपत्ति जनाएको छ । जनमतका सांसद सतिशकुमार सिंह र त्रिभुवन साह जनस्वराजमा सनाखत गर्न निर्वाचन आयोग पुग्ने क्रममा जनमतका कार्यकर्ताले अवरोध गर्न खोज्दा सामान्य झडपसमेत भएको थियो ।
दुवै पक्षले आ–आफ्नो बहुमतको दाबी गर्दै प्रदेश प्रमुख कार्यालयमा पुग्दा त्यहाँ केहीबेर तनाब सिर्जना भएको थियो । सम्भावित झडप नियन्त्रणका लागि ठूलो संख्यामा नेपाली सेना र सुरक्षा निकायका जवानहरू खटाइएको प्रदेश प्रहरी स्रोतले जनाएको छ ।
कांग्रेसले असंवैधानिक रूपमा गरिएको मुख्यमन्त्री नियुक्ति तत्काल सच्याउन माग गर्दै आन्दोलनको चेतावनी दिएको छ ।
